Sa 3000 tylli yn pynkha ïa ki Anganwadi Centre ban ai jingshakri ïa 60 hajar ngut ki khynnah

Shillong, Nailur 05 : Ka Meghalaya Early Childhood Development Mission jong ka sorkar jylla hynne ka sngi ka la pynlong ïa ka prokram ba kyrpang ban pyni ba kumno ki jingïalehkai ki ïarap na ka bynta ka jingheh jingsan jong ki heprit.
Ïa katei ka prokram ba tip ruh kum ka, ‘Play to Learn’ la plie paidbah da u Myntri Rangbah ka jylla Conrad Sangma lyngba ka video uba la ïaroh ïa ka sienjam ba shim da ka MECDM ban phai khmat haba ïadei bad kumno ban tei ïa ka jingheh jingsan jong ki khynnah ha ki snem ba ki donkam ba kin heh kin san.
U la ban jur ruh da kaba kren shaphang ki dak ki shin kiba lah ban ïohi lyngba ki jingpynheh pynsan bad jingsumar jong ki kmie ki kpa ha ka rukom kaba bha tam bad ka jinghikai jong ki khynnah lyngba ki jinghikai kiba wanrah jingkmen ïa ki khynnah nalor ki jingbam kiba tei.
Na ka liang u Myntri ka tnad Social Welfare, Bah Paul Lyngdoh u la ong ba ka jingïalehkai ka long kaba kit jingmut bha namar kadei ka lynti ban tei ïa ka jingmut jingpyrkhat jong ki khynnah khamtma na ka bynta ban thaw ïa ka lawei ba phyrnai na bynta ka Meghalaya.
Haba ïathuh bniah halor kane ha ki lad pathai khubor, u Myntri u la ïathuh ruh ba ka sorkar jylla ka la rai ban pynkha sa 3000 tylli ki anganwadi centre ha kylleng ka jylla ban pyntreikam ïa ka MECDM ha kaba kin don haduh kumba 60,000 ngut ki khynnah kiba myntoi na kane.
La ïathuh ruh ba kane ka Mission ka long ban wanrah ïa ki lynnong pule khnang ba ki Anganwadi Centre kin long ruh ki jaka pule nalor ba kin ai ruh ïa ki jingbam ba tei met.
Katba na ka liang u Principal Secretary ka tnad ka Koit ka Khiah ka sorkar jylla, Sampath Kumar u la ong ba ka sorkar Meghalaya ka ieng skhem ha ka jingtrei ba radbah jong ka ban wanrah ïa ki lad treikam treijam ban noh synniang sha kata ka jingangnud ban ïoh ïa ki jinghikai kiba bha tam ban kyntiew Ïa ki khynnah naduh ka por ba ki dang rit.
Kat haduh u bnai Nailur, ka ECD Mission ka la lah ban pynmih ïa ki jingthoh kiba ïadei bad kumno ban pynïaid ïa ka kam jong ka Mission ïa kaba yn sa sam sha ki shnong ki thaw jong ka Meghalaya khnang ba yn lah ban ïarap ïa ki briew, ki nongïalam shnong bad ki kynhun treikam shnong jong ki Seng Ïarap lade ne ki self-help group, ba ki lah ban pynïaid ïa ki kam jong ka ECD.