Na jaka ba pyndonkam ki shipai yn tei ïa ka jingkieng ba thymmai ha Umiam

Shillong, Jymmang 6 : Namar ba ka rta jongka Jingkieng bad ka Dam ha Umiam ka la kut la kumba 15 snem ei ei mynta ka sorkar ka la shim khia bad thaw ki lad ki lynti khnang ban lait na kino kino ki jingjia ba sngewsih da kaba u Symbud Myntri Rangbah ka jylla u bah Prestone Tynsong u la pyntip mynta ka Sngi Thohdieng ba ka sorkar ka la pynkhreh mynta ban tei noh da ka jingkieng ba thymmai ka ban ïaid lyngba ka jaka ba pyndonkam ki shipai ha kaba jngi ne leh ia ki jingialehkai sport hapoh um kaba ha Umiam harud ka surok bah Shillong sha Guwahati shwa ban poi artat kane ka jingkieng Dam.
Haba ïakren bad u Mawphor, u bah Prestone u la ong “Ha ka jingshisha shwa ba ka ïing bishar ba don burom jongka jylla ka High Court kan pynmih ïa ka hukum, na ka liang ka sorkar la kumba ar taiew ei ei mynta ka la dep thung ïa u consultant bad la dep leit jurip ruh ïa katei ka jaka bad ka biang bha ban tei ïa ka jingkieng ba thymmai nalor ba ka kham lyngkot shuh shuh ka jingjngai ban ïa ka jingkieng kaba rim ruh”.
“ Ha kaba ïadei pat bad ka hukum jongka ïing bishar ban ym shah shuh ïa ki kali kiba kit palat shiphew ton ban ïaid nalor katei ka jingkieng , ïa kane ka kam ngi la bynshet ha ka Chief Secretary jongka jylla I kong R.V Suchiang bad ha kane hi ka taiew ban wan in sa lum ïa ki bor synshar District ban ïakren bad pynbeit kumno ban peitngor bad ban khang ïa ki kali ba kit palat ïa ka shiphew ton ba kin ym ïaid shuh nalor kane ka jingkieng. Hadien kane ngin sa ïashong jingïalang biang ban pyntreikam ïa ki rai”. ong biang u Symbud Myntri Rangbah.
U la ïathuh “Namar ba kane ka jingkieng ba mynta ka la kut ka rta la palat 15 snem mynta kumta ka sorkar ruh ka la shim khia ban wad da kane ka jaka ban tei ïaka jingkieng ba thymmai”.
Na ka liang u Consultant bad ka kynhun jongu hadien ba ki leit jurip ïa ka jaka ki la ai kaiphod ba ka jaka ka biang bha ban tei ïa ka jingkieng ba thymmai. Ha kane ka taiew ban wan un sa wan bad ka kynhun jongu ban test ïa ka khyndew bad ban bishar bniah la kane ka jingtei ïa ka jingkieng ka don jingktah ne em ïa ka Dam, ïathuh biang u bah Prestone.
“ Hadien ba ngi la ïoh ïa ka kaiphod kaba bniah na u Consultant bad ka kynhun ba ka biang ban pynïaid shakhmat ïa ka kam kumta ngin sa pynkhreh ban tei noh ïa kane ka jingkieng ba thymmai.
Lah ban pynkynmaw ha u snem 2019 ki heh ka MeECL ki la ïathuh hakhmat ka Assembly Committee on Environment ba la ïalam ha kato ka por da u bah S.K Sun ( Bam kwai ha dwar U Blei) ba ka rta jongka dam ka la nang duna bad hiar sha ka 41 snem namar ka jingdap palat ka ktieh kaba wan tuid na ki wah ba wan nangne na sor Shillong. Ha ka jingshisha ki la ïathuh ka rta jongkane ka dam ka dei 100 snem bad lada ym dei ba jur ka jinglang ktieh ka dei ban kut haduh 2065 hynrei namar ka jingdap ktieh ka la hiar noh sha ka 2024.
Ka sorkar ka la phah ruh ïa ki kompani ban jurip bad lum jingkheiñ katno kan lut lada pynkhuid ïa ka dam da kaba sei ïa katei ka ktieh. ïa kane ka dam la sdang tei ha u snem 1960 bad la lah ban pyndep ha u snem 1965.
Na ka liang u Symbud Myntri Rangbah ula ïathuh ba ka sorkar ka dang thaw ruh sa kiwei kiwei ki lad ban pynsting ka jingïaid kali nalor katei ka jingkieng da kaba yn shna sa kawei ka surok Bypass ban kdat na kane ka Mawlai Bypass ïaid lyngba ka Umrynjah bad poi sha Umroi bad ïasoh ïa kane ka Shillong Bypass. Ki ban leit sha Guwahati kin sa khun pat shaneng bad hiar sha Guwahati bad kiba leit shaki thain Jowai kin khun sharum. Nalor kane ka DPR jongka Western Bypass ruh ka la dep artat bad ïa kane la peit hi da ka NHIDCL.
“ Nga kyrmen lyngba kine ki ar tylli ki surok ba thymmai kan dang ïarap shuh shuh ban pynsting ka jingiaid kali nalor ka jingkieng dam. Namar kane ka jingkieng ka long kaba donkam haduh katta katta ba ka dei ka surok kaba jan tam ban poi sha Shillong” Pynkut u Symbud Myntri Rangbah.