Nongstoiñ, Nailar 28: Katba nang mih ki sngi ka ïew biskot ka la nang hiar arsut ha kaba ka la buh ïa ki nongrep ha ka jingeh kaba khraw. Dang ha ka taïew ba la dep ka dor biskot ka la hiar sha ka hynriew tyngka shi kilo bad mynta ka sngi pat san tyngka shi kilo ha ka taïew ban wan la thikna ba un hiar sha ka ar tyngka.
Haba phai sha kane ka kam rep biskot wat la ka dei ka jingrep kaba tang shi sien thung ruh, hynrei ka jinglut ka bun bha ha kaba shna ïa ki rynsan, namar lada dei ki bym don siej ha ki kper lei lei, ki hap ban shu leit thied na kiwei ki shnong ha kaba ka dor jong kawei ka siej ka poi sha ka sanphew tyngka. Nangta ka bai kali ban kit lada dei ki shnong ba kham jngai, shi trok u siej ka bai kit ka la poi shiphew hajar shaneng bad kane ka la buh ha ka jingeh kaba khraw ïa ki nongrep.
Haba ïakren bad ka kong A.Wahlang ka la ong ba mynta u snem, u biskot um da soh bha kum ha kiwei ki snem bad ha u bnai ba la dep ha kaba u biskot u dang sdang ban soh, ka dor ka poi haduh sanphew tyngka shi kil. Hynrei ka hiar pat man la ka taiew haduh ba mynta ka sngi ka la hiar sha ka san tyngka shi kilo.
Ka kong Wahlang ka la ong ruh ba u biskot u la sdang ban soh bha ha kine ki sngi bad ha kine ki taiew ba la dep lada kheit ar sien shi taïew lah ban ïoh sanphew haduh hynñiew phew kilo hynrei ha kine ki sngi na ka juh ka rynsan lada kheit arsien shitaïew la lah ban pynmih phraphew haduh shispah kilo shisien kheit hynrei kam don jingmyntoi shuh namar ba wat ki mahajon ba wan thied ruh kim sngew myntoi shuh khamtam lada jngai na surok bah.
Kum ban pynkynmaw ba ha ki snem ba la dep, u bah Banteidor Lyngdoh ha ka por ba u dang bat kum u Myntri ka rep ka riang, u la kular ban thaw ki lad ki lynti ban pynïaid ïew ïa u biskot sha Bangladesh hynrei haduh kine ki sngi kam shym la urlong.
Uwei na ki nongkhaï biskot u bym kwah ban pynpaw kyrteng ïalade, u la ïathuh ha u nongthoh khubor ba hadien ba u bah Banteidor Lyngdoh u la pynpaw bad kular ba un pynïoh ïa ka ïew biskot sha Bangladesh, kumta u la pyrshang ban leit wad ïew. Hynrei ym don lynti satia ban rung, namar naduh Dawki ym lah ban lait na ki shipsi Border Security Force kumta la kut noh.
Nalor kata u la ong ba ka sorkar ka la dei ban shimkhia ha ka ban pynsngewthuh ïa ki shipai pahara khappud, ba ki dei ban shah ïa ki Nongkhaïi mar rep ba kin pynpoi ïa ki mar rep jong ki sha Bangladesh.
