Khliehriat, Nailar 28: Ka Jaiñtia Students’ Union (JSU), mynta ka sngi ka la leit ban ïakynduh ïa u Deputy Commissioner ka EJHD kumjuh ïa ki heh ka kompeni Topcem ban dawa ba dei ban beh krad noh shisyndon ïa ki arngut ki nongtrei bar jylla jong kane ka kompeni na kane ka jylla namar ka jingdonkti ha kaba pynshit ïa ki pulit ban bom ban tied naphang ïa ki paidbah ha ka por ba pynlong ia ka jingïalang ha ka shnong Thangskai, EJH ha ka 24 tarik mynta u bnai.
Ka Seng ka la ong ba kane ka jingleit dawa ban beh krad noh ïa kine ki arngut ki nongtrei napoh kane ka jylla ka long ban lait na kino kino ki jingjia ba sngewsih, bad ka seng ka la maham ruh ïa ki heh ka Topcem ba lada ki dang pynneh ïa kine ki arngut ki bar jylla hapoh kane ka kam kin sa mih ki jingsngewsih.
Ha kajuh ka por ka seng lyngba une u kyrwoh ka la ong ruh ba lada jia kiba kum kine ki jingjia na ka liang kane ka kompeni ka hap ban shim ïa ka jingkitkhlieh bad ka dei ruh ban pynsngap ïa kane ka jingdawa jong ka seng ban pynher krad noh ïa kine ki arngut ki nongtrei na kane ka jylla.
Halor kane ka jingdawa jong ka Seng, na ka liang ki heh jong katei ka kompeni ka la mynjur bad pynpaw ba ki la phah sha ki bor ba halor jong ka kompeni ban leh ïa kaba donkam.
Shuh shuh ruh ha ka jingïakynduh ïa u DC ka East Jaintia Hills, na ka liang ka jong u ruh u la kular ban thoh sha ka tnat Home bad Political Department na ka bynta ban beh noh syndon ïa kine ki arngut ki nongtrei jong katei ka kompeni na kane ka jylla.
