U drok bad ki kaikhlaw ki nongpynjot bakhraw tam ïa ka imlang sahlang: Paul Lyngdoh

Shillong, Nailar 27 : U Myntri ka tnad Tourism jong ka sorkar jylal ba dei ruh u heh ka United Democratic Party ha ka sngi Saitjain u la ong ba ki kam pyntriem bad ka khaïi drok ki paw kum ki nongshun ba sniew tam jong ka imlang sahlang.
Da kaba kdew ïa ka jingïoh ban pynpra ïa ka kynhun National Liberation Council of Nongkyndong (NLCN), ka kynhun kaikhlaw ba dang seng thymmai ha rilum Khasi – Jaiñtia, u Myntri u la ong ba ki bor jong ki kam pyntriem ki la ïap bad jah ha ka thaiñ bad kano kano ka jingpyrshang ban pynkhie im biang ïa ka da kano kano ka lad ka long tang ban ïalam bakla.
Haba kyntu ïa ki samla ba kim dei ban ngop bad shah ïalam bakla ha kum kitei ki bor, u Myntri u la ong, “Lehse, ngi poi kynmaw ruh ba ki kam kieng atiar bad u drok ki ïaid ryngkat ryngkat. Kumta ka long kaba ma namar shisien ba la don ka kynhun kieng atiar bad ka don ka jingkiew ha ki kam khaii drok kumta kan don ka jingma kaba shyrkhei bha ym tang ïa kane ka pateng ba mynta hynrei wat ïa ka pateng ban sa wan ruh.”
Shuh shuh u ong ruh ba ka jingkyrduh kam kyrduh jam, kam dei satia ban long ka jingai daw ban kieng atiar lane drok lane kino kino ki kam beain. “Ha ka jingshisha, katba phi nang leh ki kam pyntriem, katta kan nang jur ka jingduk.”
U la ong ruh ba mynta ka sorkar ka la plie lad ïa ki kam kamai na ka kam jngohkai pyrthei ha ka rukom kaba ïar bha kynthup naduh ki lad kamai na ka skim kali ban kit ïa ki nongjngohkai pyrthei, nangta ka 1000 homestay project. “Kine baroh kidei na ka bynta jongno? Kumta nga kyntu ïa ki samla ba kin shim kabu ïa kine ki skim bad ban ym shah ïalam bakla ha ka rukom pyrkhat ka bym dei,” u la bynrap shuh shuh.
Da kaba ai nuska ïa ka jylla ba marjan, utei u heh UDP u la ong ruh ba ha Assam da ki phew snem ki la sakhi bad mad ïa ki kynhun kam pyntriem hynrei katba nang ïaid ka por ym tang ba kim poi sha ka thong hynrei ka la paw ruh ba ka jingmih jong ki ka long mar khongpong.
“Mynta, ka Assam ka don ha ka roi ka pa kaba stet bha kaba ym ju ïohi ha ki snem ba la dep. Kane baroh ka urlong namar la lah ban tehlakam ïa ki kam pyntriem bad mynta ki la jah syndon,” u la ong.