Dei ban pynshitom ia ki heh Topcem bad ïa ki Pulit ba thombor ïa ki paidbah ha Thangskai: VPP

Shillong, Nailar 25: Ka Seng Voice of the People Party (VPP) kala pynrem jur ïa ki bor Pulit bad ïa ki nongtrei jong ka Meghalaya Cements Limited (MCL) kiba la donkti ha kaba bom bad tied ïa i paidbah naduh ki kynthei ki ki khynnah ruh ha ka jingpyrshah jong ki ïa ka Public Hearing ban pynheh ïa ka Topcem ha Thangskai.
Ka kyrwoh ba la phah da u Dr. Batskhem Myrboh, Nongaiktien jong ka Seng, ka ong ba kane ka jingailad ki bor District ïa ki heh Topcem ban pynshit bad phah bom phah tied ïa ki paidbah bad ka jingbom pathar ki Pulit ïa ki paidbah ba ïakhih da ka jingjai jai, ka pynpaw ba ka sorkar MDA kam dei ka sorkar jong u paidbah, hynrei kadei ka sorkar tang jong ki heh spah.
Ka Seng ka la ong ruh ba ka roi ka par kam dei ban wan da kaba ïapeiñ pat bad ka jingim ki briew bad ka jingjulor ka mei mariang. Ka la ong ruh ba ka jingïakhih ne pyrshah ba jai jai kadei ka hok jong ki paidbah, hynrei lada ka sorkar ka thom noh da ka bor ïa kine ki jingïakhih ba jai jai, ka pynpaw ba ki hok bad ka jingsynshar paidbah ki don hapdeng ka jingma.
Na ka liang ka Seng ka dawa ruh ba ki bor synshar District kidei ban pynshitom ïa ki Pulit kiba la bom pathar ïa ki paidbah bad kumjuh ruh ïa ki nongtrei ka Topcem kiba la pynshit ïa ki Pulit.