Khliehriat Iaïong 6: U President jong ka Hynñiewtrep Achik National Movement Narpuh Circle, u bah Pyndap Syiemlieh u la pynpaw ka jingsngew khia halor ka jingduh bor ding kaba khah khah ha ka thaiñ bad Ong ba khamtam ha ka por lyiur ba tang shu sdang hap u slap ka bor ding ruh ka la duh, kumta kane ka la ktah haduh katta katta ïa ki paidbah ka thaiñ khamtam ki khynnah pule.
La ong ruh ba nasuh Lumshnong ter ter don tang uwei u Lineman u ba peit ïa ka jinglong jingman ka bor ding.
Ha kajuh ka por utei u nongialam jong ka HANM Narpuh u la pynkynmaw ba Khyndiat bnai mynshwa ki la don ki sengbhalang kiba la leit ban jurip ïa ka Sub Station kaba don ha Lumshnong bad lap ba ki don da ki tiar kiba la rim bha ha katei ka Sub Station, kumta ka seng ka la kyntu jur ïa ka tnat ba kan shim khia ban pynbit pynbiang bha ïa katei ka Sub Station da ki tiar kiba bha ba kan nym thut than ka jingioh bor ding ha ka thaiñ.
Ka Hynñiewtrep Achik National Movement Narpuh Circle kaba hapoh ka jingialam u President, lem bad ki dkhot myn ha ka 5 Tarik mynta u bnai ki la leit ban ïakynduh ïa u Executive Engineer jong ka tnat bor ding East Jaiñtia Hills District bad dawa ba dei ban buh Lineman noh sa uwei ha ka thaiñ Narpuh ha Lumshnong, namar ka thaiñ Narpuh ka dei kaba heh bad ba ïar bha bad lada tang uwei u Lineman kam pat biang satia.
Katkum ka shithi ba la buh hakhmat u Executive Engineer ka seng ka pynpaw ba tang uwei u Lineman u la shem jingeh bha ban peit ïa ka thaiñ baroh kawei bad ka la long ruh kumba ban khia ïa u, lada jia ba don ka jingthut ha ka line bor ding ka la long ruh ka jingeh ïa u Lineman ba un wan poi mar mar, kane ka buh jingeh ym tang ïa u Lineman hynrei ka buh jingeh ruh ïa ki paidbah ka thaiñ, kumta ka seng ka kyntu jur bad dawa na ka tnat bor ding ba kan shim khia ïa kane kham kloi ban buh Lineman noh ha ka thaiñ Narpuh.
