Shillong, Nailar 22: Shuwa ban jam sha ka lyngkhuh sngi jong ka National Sports Day 2023 ka Meghalaya State Olympic Association (MSOA), ka Directorate of Sports & Youth Affairs
(DSYA) lem bad ka District Sports Officer jong ka East Khasi Hills ka la pynkhreh ban pynlong da ka jingïakop mareh kaba la tip da ka 5K Fitness Run ha ka 26 tarik mynta u Nailar, 2023.
Kumban shu pynkynmaw, ïa ka National Sports Day ha India la ju rakhe man u snem ha ka 29 tarik jong u Nailar, kaba dei ka lyngkhuh sngikha jong u player hockey jong ka ri India u Major Dhyan Chand. U player hockey u ba la ïoh ban khur takma ksiar ha rynsan ïalehkai jong ka Olympics na ka bynta ka India ha u snem 1928, 1932 bad 1936.
ïa ki sopti phong ba la pynkhreh da ka MSOA ha kane ka jingïakop mareh 5K Fitness Run yn ai tang ïa kito kiba poi kham kloi shuwa ban sdang ka jingpynmareh, bad ruh la pynkhreh ruh ïa ka bam na ka bynta ki nongïashimbynta ha kane ka sngi.
Shuh shuh kin don ruh haduh 50 tylli ki khusnam ba kyrpang (Special Gifts) ïa kaba yn ai ïa ki nongmareh kiba donbok. Ka jingthmu jong ka MSOA ban pynlong ïa kane ka jingïakop mareh thoong ka long ban pynshlur ïa ki paid nongshong shnong ka jylla ba ki dei ban shimkhia ïa ka jingkoit ka khiah jong ka met na ka bynta ki khynnah bad ïa kiba la rangbah ruh kumjuh.
Ka jaka ban sdang bad jaka ban pyndep ïa kane ka jingïakop mareh kan long na SSA Stadium Main Gate, Polo Ground, Shillong. Bad la ai por ïa ki nongïashimbynta ban wanpoi ha ka por 6 baje mynstep bad yn sdang ïa ka jingpyn mareh ha ka por 6 baje shiteng.
Ka kyrdan ïakop kan long na ka bynta baroh kynthei bad shynrang, bad kiba kwah ban ïashimbynta ha kane ka jingïakop mareh ki lah ban pynrung kyrteng lyngba ka Ophis treikam jong ka District Sport, bad la ai por ban thep kyrteng naduh ka 22 tarik bad kan kut haduh ka 25 tarik Nailar, 2023. Kane ka long katkum ka kyrwoh ba la pyntip da ka Meghalaya State Olympic Association (MSOA) halor ka jingpynlong jong ka ïa kane ka 5K Fitness Run ha ka 26 tarik Nailar, 2023, shuwa ban jam sha ka sngi rakhe National Sports Day 2023.
