Shillong, Nailar 22: Kum shi bynta ban rakhe ïa ka National Sports Day,ka sorkar jylla Meghalaya ka la pynbna ba mynta ka taïew kan don tamasa lehkai sport bad kilanmet ha ka jylla naduh ka 22 tarik haduh 29 tarik, Nailar. La pynshlur ïa baroh ki paid nongshong shnong ban ïashimbynta ha ki jingïalehkai bapher bapher kiba la pynkhreh ha kane ka taïew.
Ka phang pdeng ha kane ka taïew ka long ban kyntiew ïa ki jingïalehkai Sports’ bad ruh ban pynshlur ïa ki briew la ha kano kano ka kam ban ïashimbynta ha ki jingïalehkai. ïa kane ka taïew lehkai Sport la pynïaid da ka Ministry of Youth Affairs and Sports. Yn sa ïoh ruh ban pule ïa ka ‘Fit India Pledge’ da ki nongïashimbynta ha satlak jong ka ri, bad ka Meghalaya kan ïashimbyntalang lyngba ki paid nongshong shnong kiba pule ïa kane ka Fit India Pledge bad pynsaphriang ïa ki lyngba ka Social Media.
Kin don ruh ki tamasa lehkai bapher bapher ha kylleng ka jylla, ba la pynïaid da ka Sports Associations, ki Skul, bad na ki bor pynïaid District na ka bynta baroh ba kin ïashimbynta. Shuh shuh, na ka liang jong ka State Government Departments kan sa ïashimbynta ruh ha ki jait jingïalehkai bapher bapher kum ka Football, Cycling, Walkathons, bad ka Basketball. Ka sorkar kan sa pynshlur ruh ba ñiah da ki saikil lane da kaba shu ïaid kjat ha ka por leit trei, kaba yn sa pynbna shen.
Kin sa don ruh ki jingïalehkai kiba ka NYKS bad ka SAI kan sa pynlong hapoh ka jylla, ban pynshlur ïa ki dkhot jong ki ban ïashimbynta bad ruh na ka bynta ki riew paidbah.
Ka lympung kaba heh ba la pynïaid da ka tnat ba dei khmih ïa ka kam lehkai jong ka sorkar jylla kan long ha ka 26 bad 29 tarik u Nailar. Ha ka 26 tarik, Nailar, kan don ka jingïakop mareh kaba la tip da ka “Run for Fitness” ha nongbah Shillong. Ka jingïakop mareh kaba 5 Km ka ban sdang na Polo Grounds, bad kane ka jingïakop kan kynthup ïa baroh kiba kwah ban ïashimbynta bad kin hap ban pynrung kyrteng lyngba ka Office jong ka District Sports Officer, East Khasi Hills.
Ha ka 29 tarik, Nailar kan don ka jingsam Cash Awards na ka bynta ki nongïalehkai. Ha kane ka sngi kan don ruh ka jingïalehkai paralok (exhibition match) hapdeng ki Ophisar bad ki MLA’ jong ka sorkar jylla, kaba la pynkhreh ban pynlong ha MFA Ground.
Na ka liang jong u Myntri ka tnat Sports & Youth Affairs, u Bah ShakliarWarjri, u la pynpaw, “Ka Sport ka lah ban pynïatylli bad kan ïarap ïa ngi ban nangkiew shaphrang. Ka National Sports Day ka dei ka sngi ba kyrpang kaba pynkynmaw ïa ngi, bad nga pynshlur ïa baroh ki paid nongshong shnong ka Meghalaya, ban ïashimbynta ha ki jait jingïalehkai bapher bad ban pynsaphriang ïa jingkmen jong kane ka taïew lehkai sport!”
