Shillong, Jymmang, 05: Ki nongïalam jong ka Khasi Students Union (KSU) ha ka sngi Balang ki la hiar sha ka Jylla Manipur ban leit jngoh ïa ki Khasi kiba shong basah ha ka shnong Khadengar Khasi, kaba hap hapoh ka Tamenglong District hadien ba la ïoh jingtip ïa ka jingshah dakhol jaka ha ki jaidbynriew Bengali kiba sah ha Jiribam District.
Katkum ka jingïathuh jong ki Khasi kiba sha Khadengar Khasi, ka Jirabam District ka dei kaba dang shu pynkha thymmai da ka Sorkar Manipur ha u snem 2016.
La ïoh jingtip ba kane ka jingshah kyntur pud jong ki jaka ba sah da ki Khasi ka dei na ka daw ba ki jaidbynriew Bengali ki kwah ba ki Khasi kin wan lang noh sha Jiribam District da kaba ïakhladnoh bad ka Tamenglong District.
Katba ki Khasi ki la shong la sah ha ka shnong Khadengar naduh u snem 1939 eiei naduh ba ka ri India ka dang shah synshar ha ki Phareng bad nalor kata ki don ruh ïa ki kot ki sla kiba biang ban pynshisha ïa ka jinglong trai halor kane ka jaka kaba ki la buhai shnong mynta da ki phew phew snem.
Kaba kham pyn lynngoh ka long ba ka Sorkar Manipur kam shym la ithuh satia ïa ki jaidbynriew Khasi kum ki riewlum watla ki dei ki riewlum hapoh ka jylla Meghalaya kaba long kawei na ki phra tylli ki jylla riewlum jong ka Thaiñ Shatei Lammihngi ka ri India.
Ha kane ka jingleit jngoh ïa ki Khasi ha kane ka shnong, ki nongïalam ka KSU hapoh ka jingïalam jong u General Secretary u Samla Donald V. Thabah ki la shah pdiang sngewbha ha ki Khasi kiba shong basah ha Khadengar.
Ïa ki nongïalam jong ka KSU la synran lang da ki nongïalam jong ka KSU Jaiñtia Hills Unit, ki nongïalam ka KSU Barrak Valley bad ki nongïalam jong ka Rangtei Naga Students Union.
Ka Rangtei Naga Students Union ka dei ka kynhun kaba ju ai jingkyrshan bha ïa ki Khasi ha kane ka shnong haba ki mad ïa ka jingshah thombor ha ki jaidbynriew Bengalee na ka Jiribam District.
Ha ka jingïalang ba la pynlong ha Khedangar Primary School, ki nongïalam shnong ki la pynpaw ïa kiba bun ki jingeh khamtam ha kaba ïadei bad ka jingïaleh mukotduma ban pynshisha ïa ka jinglong trai ïa la ka jong ka jaka ka puta.
Na ka liang jong ki nongïalam ka KSU, kiba dang don mynta ha ka jylla Manipur, ki la pyntip ba kin sa leit ïakynduh ïa u Myntri Rangbah ka Jylla Manipur u N. Biren Singh ban ïakren sani bha halor kane ka jingshah dakhol jaka jong ki Khasi ha ki jaidbynriew Bengalee bad halor ka jingbym ithuh ka Sorkar Manipur ïa ki Khasi kum ki riewlum.
