Shillong, Jymmang 05: Ka Bharatiya Janata Party (BJP)-Meghalaya Pradesh kala kyrpad ïa ka Sorkar Pdeng ba kan pynjlan ïa ka sngi thep form jong ka eksamin Common University Entrance TEast (CUET) ha Meghalaya namar kiba bun ki jingeh ban mad da ki samla pule ka Jylla.
U President ka BJP-Meghalaya Pradesh Bah Ernest Mawrie ula phah da ka shithi sha u Myntri ka Tnad Pule ka Sorkar Pdeng hynne ka sngi palei, kaba kdew ïa shibun ki jingeh jong ki samla lada pyntreikam ïa ka CUET.
“Ka North Eastern Hill University (NEHU) ka don jingthmu ban pyntreikam ïa ka CUET na ka bynta ban pynrung klas ïa ki samla ba pule Under Graduate (UG) ha baroh ki College ba pyniasoh bad ka. Kiba bun ki samla pule ka Jylla kim don jingtip satia shaphang kane ka CUET” ong u bah Ernest Mawrie.
Kat kum ka jingong jong u, baroh ki College ha Jylla ki dei kiba iasoh bad ka NEHU bad ka jingktah jong kane ka rai ka long ba baroh ki samla ba pass klas XII mynta u snem, kin hap ban pass ïa ka CUET ban ïoh rung college.
“Kaei ka ban jia ka long ba yn ym don satia ki samla pule ha baroh kawei ka Jylla ki ban ïoh rung klas ban pule BA, B.Com, BSc bad kiwei ki ki course Under Graduate”ula ong haba bynrap “Kiba bun kilah ban nym applai ban ïakhun ïa kane ka test (CUTE) namar ka sngi ba khatduh ban applai ka dei 30 tarik Ïaiong, 2022”.
U Bah Ernest ula ong “Wat lada ki samla pule ki lah ban applai ha ka khep kaba khatduh, kan long kaba eh pat ïa ki ban ïoh shong eksam namar ba don tang kawei ka Online Exam Centre ha Shillong ym sha kiwei pat ki sor”.
Une u Nongïalam ka BJP ula ong ba ka jingdon jong ki samla ba pass ïa ka klas XII ha Jylla ka long kaba bun bha ban lah ai jaka thoh eksam tang ha kawei ka exam Centre.
“Kan mih ka jingeh ba khraw ha u bnai Jylliew-Naitung, kaba dei ka por ba ïaid ka jingpynrung klas ha ki College ka Jylla” bad bynrap “Ka don ruh ka jingma ba lah ban mih ka jingkulmar”.
Namar kata, ula kyrpad ïa ka Sorkar Pdeng ban pynjlan ïa ka sngi ba khatduh ban ailad ïa ki samla pule ba kin ïoh thep kyrteng ne applai ïa kane ka eksam.
