Shillong, Jymmang 05: Ka Sorkar Jylla kala pan ïa ka song pisa ba kot T. 215 klur na ka Sorkar Pdeng ban pyntreikam ïa ka New Shillong Water Supply Scheme (NSWSS).
Haba pyntip ia kane hynne ka sngi palei, u Myntri ba khmih ïaka tnad Public Health Engineering (PHE) bah Renikton Lyngdoh Tongkhar ula ong “Kat kum ka jingiamang tyngka, ngi donkam haduh T. 215 klur ban pyntreikam ïa ka Water Supply Scheme jong ka New Shillong Township”.
“Ngi la pyrshang mynta ban ïoh ïa ka song pisa na ka Atal Mission for Rejuvenation and Urban Transformation (AMRUT)” ula bynrap.
U Myntri ula pyntip ruh ba ka Wah Umkhen kan dei kawei na ki tyllong umbam umdih na ka bynta ka New Shillong Water Supply Scheme.
Ka sienjam ban wanrah ïa kane ka skhim kala wan hadien ba ka Sorkar Jylla kala rai ban pynkynriah noh ïa ka Secretariat bad kiwei ki Tnad Sorkar sha ka New Shillong Township.
Ka jingtyrwa ban pynkynriah ïa ki Ophis Sorkar sha Mawpdang, Mawkhanu ka dei kaba la rai da ka jingïalang jong ka kynhun Myntri bad la pynbud da ka jingleit buh maw nongrim da u Myntri Rangbah ka Jylla Conrad Kongkal Sangma myn ha u bnai Kyllalyngkot mynta u snem kum shibynta na ka jingrakhe ïa ka jingdap 50 snem ka jingïoh ïala ka jong ka Jylla.
Ka Sorkar Jylla kala dep thied haduh 807.7 acrea ka jaka ha New Shillong Township bad ka jingthmu jong kane ka long ban pynkynriah ïa ka Sorar khnang ban lah weng ïa ka jingkhapngiah jong ka Nongbah Shillong.
Ha kajuh ka por, ka North Eastern Indira Gandhi Regional Institure of Health & Medical Sciences (NEIGRIHMS) ka dei kawei na ki jingtei ba kongsan tam kaba la sdang ban treikam na ka New Shillong Township.
U Bah Renikton u pyntip baka Tnad PHE kala iarap ïa ka NEIGRIHMS ban ïoh ïa ka umbam umdih, “Ki Ophisar jong ngi kila pynkhreh ïa ka DPR ïa kaba la mynjur na NEIGRIHMS ba ka bei ïa ka tyngka ka ba donkam” ula ong.
U Myntri ula pyntip ruh ba katto katne na ki Tnad ba ki Institute kila pyrshang hi dalade ban pynbiang ïa ka um bam umdih. “Ki lah ban leh ïa kane naba ki don ïala ka jong ka pisa, ym tang ka PHE kaba lah ban pynbiang ïa ka umbam umdih ïa ki”ula ong.
U Myntri u pyntip ba hapoh ka AMRUT, ka Sorkar Pdeng kala bei tyngka haduh T. 119 klur ban pyntrei ïa ka Williamnagar Water Supply Scheme.
