Nongpoh, Nailar 21: Ban tip ïa ki jingduna bad ki jingeh ha ki jaka ai jingsumar bapher bapher hapoh ka Jirang Constituency kynthup naduh ki PHC, Health Sub Centre bad ki CHC ba don ha ka Jirang Constituency, u MLA ka Jirang Constituency mynta ka sngi u la lum la lang ïa baroh ki Doctor, ki Nurse bad ki nongpeit nongkhmih kitei ki jaka ai jingsumar na ka bynta ba ïa phylliew jingmut halor ki jingeh kitei ki jaka ai jingsumar bad ruh kum u MLA un sa shim khia pat ban pynsngew sha ka sorkar na ka bynta ban pynbit pynbiang ha kitei ki jaka ai jingsumar.\
U MLA ka Jirang Constituency, u Bah Sosthenes Sohtuh u la lum kyrpang ruh ban ïa kynduh lang ïa ki bor ba dei peit katei ka jaka ai jingsumar naduh ki Doctor, ki Nurse bad ki nongpeit nongkhmih ka dei shi bynta ban ioh jingtip halor ki jingduna ha kitei ki jaka ai jingsumar shuwa ba ka myntri ka koit ka khiah ka sorkar jylla, ka Dr. Ampareen Lyngdoh kan sa wan ha Nongpoh ha ka 23 tarik u Nailar 2023 na ka bynta ban ïa kynduh ïa ki nongpeit nongkhmih jong ka tnad ka koit ka khiah ha Ri Bhoi District.
Ïa kane ka jingïakynduh lang ki Doctor, ki Nurse bad ki nongpeit nongkhmih kitei ki jaka ai jingsumar na Jirang Constituency la pynlong mynta ka sngi ha IB, Byrnihat bad kum u MLA u la ioh ban lum shibun ki jingduna na kitei ki jaka ai jignsumar kaba un sa pynsngew pat sha ka myntri ka koit ka khiah bad ruh sha ka sorkar jylla.
Kumba la pynpaw da u MLA ka Jirang, u Bah Sosthenes Sohtun ha katei ka jingïalang, la ong ba ka jingthmu kaba u la lum ïa kitei ki nongpeit nongkhmih jong ki jaka ai jingsumar ba don ha Jirang, ka dei halor ka nongrim ba un ioh jingtip shaphang ki jingduna kiba don ha kitei ki jaka ai jingsumar bad kumba la pynpaw da ki nongpeit nongkhmih un sa pyntip pat sha ka myntri ka koit ka khiah bad ruh sha ka sorkar ba kin pynbit pynbiang lang ïa kitei ki jingduna, khnang ba ki paidbah ha Jirang Constituency kin ioh ïa ka jingsumar kaba bit ba biang ha ka pang ka shitom bad khamtam kan ai jingmyntoi kham bha na ka bynta kito ki longing baduk ba kyrduh kiba ym kot bor ba leit sumar sha ki jaka ai jingsumar ki riew shimet, u la bynrap.
