Shillong, Jymmang 05: Ki nongïalehkai siat khnam ka jylla kila shim bynta shitrhem ha ka lympung ïalehkai 4th Meghalaya Games 2022 bad kila ïoh ka jingai mynsiem bad ïaroh na u coach ka kynhun siat suloi ka ri India u Mim Bahadur Gurung bad na u khlur siat khnam kynsai ka ri u Atanu Das.
U Atanu Das, uba jop arsien ïa ka World Cup, Asian Championships bad World Championships, ba ryngkat u coach kila wan ban sakhi ïa ka Meghalaya Games ha nongbah Shillong bad shi bynta ka jingpynkhreh na ka bynta ki tournament kiban sa long shen.
Kila aiti ruh ïa ki takma sha ki nongïalehkai ha SAI Centre, NEHU ha ka jingïadonlang u Working President ka Meghalaya State Olympic Association (MSOA) Bah John F Kharshiing bad Vice-President Bah Bor Diengdoh.
Haba ai jingkren ha kane ka sngi, na ka liang ka President jong ka Archery Association of Meghalaya ka Kong Matsiewdor War Nongbri kala ong ba ka jingdon jong ki ka ai mynsiem shibun ïa ki nongïalehkai siat khnam dang khie ka jylla.
Watla ha kane ka sngi kala don ka jingshah pynthut ha ki bor ka mariang, u Das u la ong ba kane kan ym dei ka jingeh na ka bynta ki nongïalehkai.
“Nga dap da ka jingsngewkmen ban don hangne. Ka jaka bad ka jinglong jong ka suiñ bneng ka long kaba itynnad. Ki don shibun ki nongïalehkai ba dang samla kiba don ka sap bala wan ban ïashim bynta, bad katkum ka jingïohi jong nga ba ki donkam katto katne ki jingdonkam la ka long ha ka liang ki jaka bad ki tiar ïalehkai na ka sorkar khnang ba kin ïoh mynsiem ban wan shakhmat ha kane ka jingïalehkai,” ong u Atanu Das bala 30 snem ka rta uba khur takma Ksiar arsien ha ka World Cup.
Katba na ka liang u Gurung u la ong ba u da sngewtynnad palat ban peit ïa ka jingïalehkai jong ki nongsiat khnam ha kane ka sngi bad bynrap ruh ba ka Shillong kadei ka jaka kaba kyrshan bha ki jingïalehkai.
U Gurung u la ong shi bynta ban pynkhreh na bynta ka World Championships kaban sa long ha Berlin ha u snem ban wan, u Das un kilan met ha Nongbah Shillong na bynta ar bnai namar ka jinglong ka suiñ bneng hangne kan ïarap na bynta jong u (Atanu Das) ban pynjanai ïalade.
