Wat tang uwei ruh ym don ba leit ai sakhi na Meghalaya hakhmat ka Enquiry Commission ba la thung da ka Sorkar Assam

Shillong, Nailar, 07: Wat tang uwei ruh ym don satia na ka Jylla Meghalaya ban leit ai sakhi ha ka Lah Sngi u Blei ha nongbah Shillong ba la pynlong da ka Enquiry Commission ba la thung da ka Sorkar Assam ban tohkit halor ka jingkyllon ïap jong ki hynriew ngut ki briew kiba la shah synreit kuli na ki ktang suloi jong ki Pulit ka Jylla Assam ha ka 22 tarik, Naiwieng, 2022 ha ka shnong Mukroh, West Jaiñtia Hills district.
Haba pynpaw ïa ka jingsngewkhia, ka Chairperson jong ka Commission ka Justice Rumi Kumari Phukan kaba long ruh ka Nongbishar ba la shongthait jong ka Iingbishar Guwahati High Court ka la ong, “nga dap da ka jinglynngoh wat hadien ba la ai ïa ka jingpynbna bad ka jingpyntip lyngba ki lad pathai khubor ha ka 4 tarik, Nailar, 2023 hynrei ym don satia wat tang uwei ruh uba la wan mih hakhmat ka Commission.”
“Ngi la ïai ap haduh ka por shiteng sngi bad mynta ngin hap ban pynkut noh ïa ka jingshong bishar na ka liang jong ka Jylla Meghalaya. Nga la rai ban pyndep ïa ka jingshong bishar bad ngi hap ban ai ïa ka rai halor ka jingïoh ïa ki sakhi ki sabut ïa kiba la ïoh lum da kaCommission,” ka la bynrap.
Ïa kane ka jingshong bishar na ka bynta ki nongai sakhi na ka jylla Meghalaya la pynong ha Assam House.
Ka Justice Phukan ka la ong ba ka Commission ka ladep pyntip lyngba ki bor synshar distrik bad ïa u Deputy Commissioner jong ka West Jaiñtia Hills bad ïa u Secretary jong ka Sorkar Meghalaya ba kino kino ki briew, ki nongsakhi bad kiba don jingtip halor (ka jingjia ha Mukroh) ki lah ban wan mih hakhmat ka Commission mynta ka sngi bad ban ai ïa ka sakhi sabut.
Kane ka long hadien ba ka Commission ka la dep bishar palat 53 haduh 55 ngut ki nongsakhi bad lum ruh ïa ki kot ki sla kum ki sakhi na ka liang jong ka Assam.
“Ngi la rekod bun ngut ki nongsakhi, kito kiba leit sha ka kamram ha ka sngi ba la jia bad ngi la lum ruh ïa ki kot ki sla kum ki sakhi ruh kumjuh. Ka bynta jong ngi ka la kut. Mynta ngin ap sa na ka liang jong ka jylla Meghalaya,” ong ka Chairperson bad bynrap, “ngi la bthah ïa ka Sorkar Assam ba kan ai ïa ki kot ki sla ba donkam namarba ba baroh ki sakhi bad ki kot ki sla kim don satia ïa mynta bad ka Commission.”
Shuh shuh, ka Justice Phukan ka la ong ba ka Sorkar Meghalaya ka la thung ïa ka Enquiry Commission bad rekod ruh ïa ki sakhi satar na ka liang jong ka Assam, ba kynthup naduh ki Pulit, ki Pulit pahara khlaw bad bun ngut ki briew.
“Ki (na ka jylla Assam) la shah skhor ïa ka notis ba la phah da ka Commission (na Meghalaya). Hynrei na ka Commission jong ngi, ngim don kano kano ka jingtip shaphang ki nongai sakhi lait noh tang ïa ka jait bad kiwei kiwei. Namarkata, ngi la bthah ïa ki bor synshar district ban phah ïa ki nongsahi lada long kaba lah hakhmat ka Commission hynrei kaba lynngoh ka long ba ym don wat tang uwei ruh ban wan mih hakhmat ka Commission,” la kren bynñiaw ka Chairperson.
Ka la bynrap, “ki (sorkar Meghalaya) la dei ban pyntip eiei shaphang ki kot ki sla hynrei ym don eiei wat khyndiat ruh.”
Katkum ka jingong jong ka, ka kwah ban ïohsngew na ki paidbah ka Jylla Meghalaya bad ban ailad ïa ki ban wanrah ïa ki kot ki sla bad ki sakhi satar shwa ban pynkut ïa ka jingtohkit. Hynrei, ka jingshong bishar kan ym don shuh da kawei pat namarba kan long ka kam kaba shu long lehnohei.
Haba kylli, lano ka Commission kan phah ïa ka kaiphod sha ka Sorkar Assam, ka Justice Phukan ka la ong, “…yn hap ban pynkut noh namarba u Investigating Officer um shym la wanrah ïa ka Case Diary, ngi ladep buh ïa ka tarik ha ka taiew ban wan lehse ha ka 22 tarik Nailar na ka bynta ki sakhi satar jong u IO. U hap ban wanrah ïa ka Case Diary shaphang ka jingtohkit ba ladep pynlong bad ïa ki sakhi sabut ba la ïoh lum bad halor ki sakhi sabut na u IO bad kiwei kiwei ki sakhi ki sabut ba la don ngin sa ai ïa ka rai jong ngi.”
Ka la ïathuh shuh shuh ba ka bynta kaba kongsan tam ha kane ka jingshong bishar jong ka Commission ka la long ha Bungalow jong ka Irrigation department, West Karbi Anglong District bad ïa kaba dang sah la pynkynriah sha ka ophis jong ka Commisison ha Guwahati.
Hadien ba la thaw ïa ka Commission, ka Justice Phukan ka la leit jurip ïa ka jaka ba la jia ka jingsiat ïap ki briew ha Mukroh. Ka la ïathuh ba kaCcommission kam shym la ïakren eiei bad ki briew ha ka jingleit jurip bad bynrap, “ban shu kren ïa ki paidbah hangne hangtai kam don jingmut satia lymda ngi ïoh bha ban sngap.”
Hynriew ngut ki briew kiba la duhei ïa ka jingsynrei kuli ki Pulit ka Jylla Assam ha Mukroh ki kynthup ïa ki san ngut ki nongshong shnong jong ka shnong Mukroh bad uwei pat u dei u nongpahara khlaw jong ka Sorkar Assam.
Ka Sorkar Assam ka la thung ïa ka Commission ba la khlieh da ka Justice Phukan ha ka 23 tarik Naiwieng, 2022.