Shillong, Jymmang 04 : Ka jingpynlip bording ba man la ka sngi ha ka jylla kan dei tang na ka bynta shipor ar por, pyntip u Symbud Myntri Rnagbah ka Jylla ba dei peit ïa ka tnad Bording ha kane ka sngi Balang.
Katkum ka jingong jong u, ka daw kaba pynlong ïa ka tnad bording ban pynlip bording man ka sngi kadei namar ka jinghiar palat ka um ha Umïam bad namar ba ka jylla haduh mynta ka shaniah sa tang ha ka bording kaba mih na Leshka.
“Lada duna ka jingpynmih bording ym banse ban hap thied na iew ha kaba ka dor ka poi 11 haduh 12 tyngka na bynta shi Unit. Hynrei ka dor kaba ngi ai sha ki paidbah nongshong shnong ka jylla pat ka long tang kumba 6 tyngka shi unit. Kumta ka long ka jingduhnong kaba khraw ïangi lada mynta ngi thied shi thied ïa ka bording na ïew ha ka dor kaba heh bad kane kan ktah haduh katta katta,” u la bynrap shuh shuh.
U Symbud Mynri Rangbah u la ong ruh ba na ka bynta ban pynduna ïa kane, kumta kim banse ban wad ki lad ki lynti bad pyrshang ban peit ba ka jingpynlip bording kam dei ban long tang ar kynta. “Nga la bthah ba ha kito ki zone ba la phiah ba ka jingpynlip bording kan long shi kynta ha kawei ka jaka, shi kynta ha kawei pat ka jaka.”
Ha kajuh ka por, u la ong ba ki paidbah kin ïaishah lang namar kane ka long tang shipor arpor. U ong ruh ba mynta ka la sdang slap bad kumta ki don ka jingkyrmen ba ha kine ki khyndiat sngi yn sa lait noh na ka jingpynlip bording.
