Shillong, Jymmang 04 : U Myntri ka tnad Pule Puthi ka sorkar jylla, u Bah Lahkmen Rymbui ha ka sngi Balang u la ong ba ki nonghikai hapoh ka lama jong ka FASTOM ki dei ban don ka jingshaniah ha ka sorkar na ka bynta ban pynurlong ïa ki jingdawa ba ki la dep ban pynsngew sha ka sorkar jylla.
Haba kren bad ki lad pathai khubor, u Myntri u la ong, “Kadei ka kamram jong ka sorkar ban peit ïa ka bha ka miat ki paidbah la kadei naka bynta ki nongrep, ki nonghikai ne mano mano ruh bad halor ka jing dawa ka seng FASTOM na ka liang ka sorkar ruh ka dang bishar ïa baroh ki jing dawa.”
Shuh shuh u ong ruh haba ka sorkar ka dang bishar halor kitei ki jingdawa, na ka liang ki nonghikai FASTOM ki dei ban buh ka jingshaniah ha ka sorkar ban pyndep ïa ka kamram.
Kumban shu kdew hangne, ka FASTOM ka la dawa na u Myntri ban kyntiew kaba mar 18,000 tyngka sha baroh ki nonghikai kiba don ha katei ka thup jong ki.
