Shillong, Naitung, 27: U Symbud Myntri Rangbah ka Jylla uba peit ïa ka tnat Kam Pohing Bah Prestone Tynsong ha ka sngi Palei u la ong ki shipai BSF kiba donkti ban siat ïap ïa u Bah Roning Nongkynrih ha ka shnong Mawshun, Pynursla Civil Sub-division, ki lah ban shah beh syndon na ka kam.
“Mynta ka jingtian bishar da ka Tribunal ka dang ïaid bad kumba ka paw, ki lah ban wat ban shah beh (na ka kam),” ong u Bah Tynsong ha ka jingïakren bad ki lad pathai khubor.
U la ong, ki shipai BSF kiba donkti ki dang don haduh mynta ha ka jingshah sospon hadien ka jingsiat ïap ïa u Bah Roning.
Ha ka 6 tarik, Jymang mynta u snem, u Bah Roning Nongkynrih, 32 snem uba dei na ka shnong Jalynteng, Nongkynrih u la shah siat ïap ha ki shipai BSF ha ka shnong Mawshun. U Bah Roning uba dang ñiah ïa ka trok kit masi, kynsan kynsan u la shah synreit kuli ha ki shipai BSF.
Hadien kane ka jingjia, lai ngut ki shipai BSF kiba la ithuh kyrteng kum u Moni Singh uba dei u Head Constable, u Sengel Singh uba dei u Constable bad u nongñiah kali u Kdam Kishore ki la shah kem.
Katkum ka jingpyntip jong ki heh Shipai BSF, dei u Head Constable uba la siat haduh lai kuli na ka suloi Beretta SMG ïa u Bah Roning uba la khlad noh hashen.
