Ki wan ban pynmynsaw bad thmu ban shim ïa ka jingim jong u CM, lap ki Pulit

Shillong, Naitung 25: Ka jingïakulmar ha Tura ha ka lah sngi U Blei kadei kaba la plan lypa bad i kumba kadei ka jingïadonkti lang ki Political Party, namar na ki 20 ngut kiba la shah kem, ki don bun ki dkhot ka TMC bad BJP. Uba hehduh na kine kiba shah kem udei u Richard Marak, u nongïalam ka TMC bad u briew ba ïajan bha bad u Dr. Mukul Sangma.
Ha ka jingtohkit ki Pulit na kine kiba shah kem, la lap ba kadei ka jingthmu ym tangh ban pynkulmar, hynrei ban pynmynsaw ïa u Myntri Rangbah u Conrad Sangma bad wat haduh u pud ban shim ïa ka jingim jong u ruh.
“Kadei kaba ki la plan lypa bad ki wan ruh da ka jingthmu ban pynmynsaw bad wat ban shim ïa ka jingim u Myntri Rangbah”, la ïathuh u Director General of Police (DGP) u Dr. LR Bishnoi ha ka jingïalang bad ki nongthoh khubor mynta ka sngi ha kaba la ïadon lang ruh kiwei kiwei ki heh Pulit.
U DGP, u la ïathuh ba kiba pynkulmar ki la wan poi ha Tura naduh ka 23 tarik bad haba ki wan sha ka jingïalang shah thngan ki wan khyndiat khyndiat ngut bad rah ruh ïa kyiad, ka pisa namar kala don ka jingsam pisa, nangta ki maw, ki dieng bad kiwei kiwei.
Haba ïathuh ïa ka jingjia hynnin ka janmiet, u Dr. Bishnoi, u la ïathuh ba katba ka jingïalang ka dang ïaid ha Mini Secretariat hapdeng u Myntri Rangbah, u Myntri ka tnad PHE bad ka 18 ngut ki nongïalam Sengbhalang, hamar ban sa wai noh ka jingïalang kine ki la pynshit ïa ki paidbah bad uba donkti ha kane ka jingkren pynshit paidbah udei u Salseng R. Marak, uba la shah beh na ka kam Pulit ha u snem 2012 bad la ïoh jingtip ruh ba udei uba la ju ïakhun ïa ka elekshon MDC.
Hadien ka jingkren jong u, ki paidbah kiba dang shu wan thymmai ha jaka shah thngan ki la kwang maw, kawang shuki, kawang da ki dieng haduh ba 18 ngut Pulit ki la mynsaw. Na kine 10 ngut kidei ki Pulit MLP bad 8 ngut kidei ki Kynthei. Nangta kawei ka Pulit Home Guard bad 7 ngut ki CRP.
U DGP u la ïathuh ba kine ki runar ki la kawang maw ruh wat ïa ka Ambulance kaba kit ïa ki Pulit ba mynsaw na Mini Secretariat sha Civil Hospital Tura ruh ka la shah kawang maw. U la ïathuh ruh ba katba nang miet ka jingkulmar ka la nang jur, ha kaba ka la don ka jingthang haduh 21 tylli ki Kali ki la julor bad 4 tylli ki la shah thang, ha kaba artylli ki la ingkhong lut khait. Na kine ki 21 tylli, 5 tylli kidei ki kali jong u Myntri Rangbah.
“Ngi la rejistar case pyrshah ïa baroh kiba la shah kem bad ka jingtohkit ka la nang ïaid. Hynrei lada ka long kumno kumno ruh na ka liang ka aiñ kan leh da kaba tyngeh”, la ong u DGP.
Haba la kylli kumno haba kane ka jingpynkulmar kadei kaba la plan ne suh buit lypa kumno ki Pulit kim ïoh jingtip. U hehduh ki Pulit, u la ong namar ka jingwan ki briew sha kane ka jingïalang ka long khyndiat khyndiat ngut, ki Pulit kim shym la suba sniew eiei, hynrei wat la katta ruh ka lah ban don ka jingkheiñ sting na ka liang ki Pulit kiba don ha Tura bad ïa kane lah ban lap hadien ba la pynlong ïa ka jingtohkit.
U la ïathuh ruh ba la buh kumba 500 ngut eiei ki Pulit bad ki CRPF ha nongbah Tura ha kine ki sngi ba don ka jingïakhih shah thngan hangtei.
Ki runar kiba ki Pulit ki la ithuh lyngba ka Video kiba ïadon kti ha kane ka jingjia ki long baroh 56 ngut bad na kine ki 20 ngut kiba la shah kem, ki Pulit ki dang pynlong ka jingthwet sa ïa kiwei pat kiban shah kem, khamtam eh ïa u Salseng R.Marak, uba mynta u la phet rieh.