Shillong, Naitung, 22: Da ki phew spah ngut ki jaidbynriew Kuki, Zo, Vaiphei kiba sah ha kane ka nongbah Shillong bad kynthup ïa kiba la wan phetrieh sha kane ka jylla Meghalaya ki la dawa ïa ka Sorkar Pdeng bad ka Sorkar Manipur ban wanrah biang ïa ka shongsuk shongsaiñ hapdeng ki jaidbynriew Kuki bad ki jaidbynriew Meitei ha ka Jylla Manipur.
Ha ka jingïalum paidbah ha Don Bosco Square, Laitumkhrah, Shillong, la sakhi ïa ki jaidbynriew Kuki, Zo, Vaiphei ryngkat bad ka riam iong bad la ki mombati ha la ki kti ki la pyrta, “ngi dawa ïa ka jingsuk ha Manipur’ bad rah ruh ïa ki plakad ba la thoh ïa ki kyntien pynrem ïa ki Meitei, ïa ka Sorkar Manipur bad ka Sorkar Pdeng bad kynthup ki kyntien sngewlem ïa ki Kuki kiba la shah pynïap bad mad ïa ki jingshah pyntyrha har rukom.
La sakhi ruh ïa ki trai jylla Khasi bad kiwei kiwei ki jaidbynriew kiba wan synran lang ha kane ka jingïalum paidbah ba la pynlong da ka Manipur Support Group.
Ka Jylla Manipur mynta la ar bnai tam ka la sakhi ïa ka jingïakynad hapdeng ki Kuki bad ki Meitei kaba la khie haduh ka 3 tarik, Jymmang, 2023. Da ki hajar ngut ki jaitbynriew Kuki ki la kylla phetwir bad mad ruh ïa ki jingshah pynjulor ki ing ki sem, ki jingshah pynïap bad dang shen arngut ki kynthei Kuki ki la shah pynïaid lyngkhuid ha ki runar Meitei kat haduh ba kane ka jingjia ka la pynkhihwin ïa ka ri India baroh kawei.
Ka nongïalam jong ka KAM ka Kong Angela Rngad ha ka jingïakren bad ki lad pathai khubor, ka la ong, “ki paidbah nongshong shnong jong ka nongbah Shillong kiba la ïalum lang mynta ka sngi ki la pyrshah ïa ka jingkhie ka thma pohing ha Manipur kaba la kynjoh mynta la ar bnai tam. Ka ladei ka por ïa ngi baroh ha kane ka thaiñ ba kum kine ki jingïaumsnam ha ka Jylla Manipur bad ïa ka jingïaisih ba la pynsaphriang, ka dei kaei kaei, kaba kito kiba bat ïa u lakam synshar ki tip shai kdar bad ha ka jingshisha dei ma ki, kiba hap ban shim ïa ka jingkitkhlieh.”
“Ki la pynkhih ïa ki kynhun pyntriem, ki la sei ïa ki kynhun kieng atiar bad ailad ïa ki kynhun kieng atiar ban leh ïa ki kam pyntriem da kaba pynlong sohpdung ïa ki mynsiem briew bad ki la pyndonkam ban pynïashrut ïa ki Kuki pyrshah ïa ki Meitei bad ki Meitei pyrshah ïa ki Kuki,” ka la ong.
“Ka Sorkar u Biren Singh bad ka Sorkar u Modi ki dei ban jingkheiñ ïa kaei kaba la jia ha Manipur. Ngi hap ban sangeh noh ka jingïakdew kti markylliang bad baroh ki shympriah kti jong ngi ki hap ban kdew sha ka Sorkar. Ngi hap ban dawa ïa ka jingshisha. Kine ki dei ki kam bymman ki bym lah satia ban pdiang. Ki jingshah thang ki ing ki sem, ki jingshah pynïap bad ka jingshah pynïaid lyngkhuid jong ki arngut ki kynthei bad ka jingpynlong sohpdung ïa ki kynthei ha ka jingïaumsnam. Haba kum kine ki jingjia pyrshah ïa ki kynthei ki wan jia, ki lah ban jia ha kano kano ka jaka, ngi hap ban mih lang shakhmat da kawei ka sur ban pynrem bad ngi hap ban phah ïa u kyrwoh uba shai ba ngin ym ailad ba kane ka thaiñ jong ngi kan shah pynsynjor, ban shah pyndonkam ha ki nongsynshar donbor kiba ñiat ïa ki runar ban kynshoit ïa ka jingïaisih bad ka jingphiah arliang,” la kynthoh ka Kong Angela.
Ka Kong Pelcy Snaitang kum ka riewkynthei kaba long ruh ka President barim jong ka BJP Mahila Morcha Meghalaya State Unit, ka la ong, “haba ngi ïohi ïa ka video ha ka Social Media ba arngut ki kynthei ki la shah pynïaid lyngkhuit hakhmat ki paidbhur ha Manipur bad ka jingshah thombor kaba ngim pat ju ïohi mynno mynno ruh, ka ktah shisha ïa ka mynsiem bad ïa ka jingsngew jong ngi kum ki longkmie. Dei na kata ka daw ngi wan ban ïasnohkti lang ban pyni ïa ka jingsngewlem bad ka jingbym pdiang ha ka imlang ka sahlang la ka dei ïa ki Khasi ne ïa ki dkhar ne ïa kino kino ki jaitniam ne ki jaidbynriew kiba don hapoh ka ri India baieid jong ngi. Kum ka longkmie ka ktah ïa ka jingsngew bad kum ïa kine ki jingjia ngim lah ban pdiang ha ka imlang ka sahlang.”
“Ka ka jingshah pynïaid lyngkhuit jong ki arngut ki kynthei (Kuki) ka la ktah shisha ïa ka longryngieng jong ngi ki kynthei bad ngi ïohi ba bun ki jylla jong ka ri India ki la ieng pyrshah ïa ka jingthombor ki Meitei pyrshah ïa ki kynthei Kuki. Ma ngi ruh kum ka jaidbynriew ba tipbriew tipblei ngi pyrshah jur ïa kane ka jingjia,” la ong shuh shuh ka Kong Snaitang.
Uwei na ki nongïalam ka Manipur Support Group u la ong, “ngi ïalum lang mynta ka sngi hangne ban pyrta ïa ka jingsuk bad ban pynkut noh ïa ki jingïaumsnam ha ka jylla Manipur. Ka Sorkar Manipur ka dei ban ai jingkheñ bad ka Sorkar kaba don ïa ka bor ka dei ruh ban don ïa ka mon bajwat ban wanrah biang ïa ka shongsuk shongsaiñ.” Shwa ban pynkut ïa ka jingïalum paidbah, la sakhi ba la thang ïa ki mombati sawdong u durmot jong u Don Bosco ha Laitumkhrah bad ïa ki kynroh jong ka skul St. Anthony’s LP School bad ha ki lynti ïaid kjat ba don markhap bad kane ka jaka.
Ha kane ka sngi, la ïohi ruh ba ki jaidbynriew Kuki, Zo, bad Vaiphei kiba la ïashim bynta ha kane ka jingïalang ki la riam da ki jaiñ iong kum ka dak ban pynpaw ïa ka jingsngewsih kthang halor ka jingïaumsnam hapdeng ki Kuki bad ki Meitei ha Manipur.
