Katba dang ïaid ka jingkren ïasuk poi ki shithi dawa pisa sha ki heh saipan ha ka kyrteng ka HNLC

Shillong, Naitung 23 : Hato don kiba shim kabu ban pynpulom ïa ka jingkren ïasuk ne dei ba leh hi ka seng Hynniewtrep National Liberation Council (HNLC) ban dawa pisa na ki heh saipan ne ki nongkhaïi heh spah ha ka jylla ka long ka jingkylli kaba khraw eh hakhmat jong baroh, namar dang ha kine ki khyndiat sngi kiba bun ki heh spah hangne ha ri lum Khasi bad Jaintia la kynnoh ba ki la ïoh pdiang ïa ki shithi dawa pisa ha ka kyrteng ka seng HNLC.
Kane ka la jia ha ka por ba ka jingkren ïasuk hapdeng ka seng HNLC- ka sorkar pdeng bad ka sorkar jylla ka dang ïaid shakhmat mynta. ïa kane ka shithi la soi bad phah da u M.Rynjah uba kam ba u dei u Finance Secretary ka seng lane da u Synshar Khymdeit uba kam ba u dei u Area Collector jongka seng uba peit ïa kane ka East Khasi Hills bad Ri Bhoi.
Kiba ïoh pdiang ïa kine ki shithi dawa pisa ki dei naduh ki nongkhaïi bar jylla bad ki trai jylla ruh bad la pynpaw ba ka dei ruh ka khajna (Income Tax) ba dei ban siew sha ka seng na ka bynta une u snem 2023.
Ha katei ka shithi ba la phah la pynpaw “Ka tnad Finance jongka seng HNLC ka la ïoh jingtip bha halor ka kamai kajih jong phi bad katno ka jingdon spah jongphi kumta ka seng ka la hap ban lum ïa ka Income Tax na ka jingïoh jongphi”.
Ym tang katta ha ka shithi la byrngem ba ka seng kan ym shim ka jingkitkhlieh lada jia ei ei ïa kito ki bym siew ïa kane ka jingdawa ïa kaba yn leh da ki shipai jongka.
Ka jingdawa ka long hapdeng ka 15 haduh 80 lak tyngka bad la maham ruh ha katei ka shithi ba ym bit da lei lei ruh ban pyntip sha ki pulit.
La ïathuh ba da ki phew ngut ki nongkhaïi ki la ïoh pdiang ïa kane ka shithi ha kine ki khyndiat bnai ba la dep.Lada dei ba leh ka seng HNLC kumno pat kan wan sha ka miej jingïakren ka long ka jingkylli jong kiba bun ba la ïoh pdiang ïa kane ka jingdawa pisa.
Namar ha ka jingïakren kawei na ki kyndon ba ka seng HNLC ka la dawa ka long ban map lut ïa baroh ki jingshah pynngat kyndon aiñ jong ki dkhot bad nongïalam ka seng khnang ba ka jingïakren kan ïaid beit shakhmat. ïa kane ka mat ka seng ka la pynpaw ha ka jingïakren bad ka sorkar pdeng bad sorkar jylla ha ka 24 tarik Jylliew 2023.
Dang ha ka 20 tarik mynta u bnai pat u Myntri Rangbah u Conrad K Sangma u dang ong ba ka sorkar kan bishar sani ïa kine ki jingdawa jongka seng HNLC ban map lut ïa baroh ki jingshah pynngat kyndon aiñ ki nongïalam bad dkhot jongka seng.
“ Kiei kiba lah ban leh ha ka bor jongka sorkar jylla ngin bishar bniah katba lah namar ka don ka jingkwah ban poi noh sha kaba seisoh ka jingïakren tangba ha ka juh ka por ka long kaba eh bha namar kane ka kam kam shong tang ha ka bor jongka sorkar jylla hynrei ka sorkar pdeng lyngba ka tnad kam pohiing ka don bynta lang ha kane ka jingkren ïasuk bad kumta hap ban ïoh ka jingïamynjur lang. Hynrei kumba nga ju ong ba ngin pynïaid shakhmat ïa ka kam ban ïohi ïa ki jingseisoh namar ngi kwah ban poi sha ka jingïasngewthuh jingmut bad jingshongsuk shongsaiñ ka ban ïaineh shitra. Hooid na ka liang ka sorkar jylla ka shim khia bha ïa ka kam ban poi sha ka thong bad ngin pyrshang katba lah na ka liang jong ngi ban ïakren bad ïa pynbeit bad ka tnad kam pohïing ka sorkar pdeng khnang ba da ka jingïamynjur lang yn shim ïa ka rai” ong u Myntri Rangbah.