Shillong, Jymmang 03 : U Myntri Rangbah ka Jylla, Conrad K Sangma ha ka sngi Ba-ar u la ong ba ki samla pule kiba kwah ban bteng ïa ki jingpule Under Graduate ha ki private college ne ki college jong ka sorkar kim donkam satia ban leit leh ïa ka eksam Common University Entrance Test (CUET).
Haba kren bad ki lad pathai khubor hadien ka jingïalang plie pyrda ïa ka Meghalaya Games, u Myntri Rangbah u la ong ba kito ki College ki bym don jingïadei bad ka skulbah NEHU kim donkam satia ban leit thoh ïa ka eksam wat ha ki snem ban wan ruh.
La ïathuh ruh ba u la dep ban ïakren bad pyntip ruh sha u Myntri ka tnad Pule Puthi jong ka Sorkar Pdeng, u Dharmendra Pradhan hynin ka sngi ba ïa ka eksam CUET la bthah ban bud beit na bynta baroh ki college ba don jingïadei bad ki skulbah jong ka sorkar pdeng.
Halor kane, u la ong ba na ka liang u Myntri ka tnad Pule Puthi ka sorkar pdeng u la mynjur ïa ka jingïakren ba kumno ki samla pule kiba kwah ban pyndep ïa ka Under Graduate ha ki private college ne ki college ba bei tyngka da ka sorkar jylla ki donkam ban ïakhun ïa ka CUET.
Da kaba ai nuska artad, u Myntri Rangbah u l aong ba ki samla kiba pule ha ki college kiba don kumba 200 kilometer na NEHU kin ym aplai lane don ka jingthmu ban bteng ka jingpule ha NEHU. U ong ruh ba kitei ki samla pule kin kham jied ban don ha la ki jong ki jaka ne ki distrik ban bteng ïa ka jingpule. “Kumta, kumno kitei ki samla pule kin wan ban ïakhun ïa katei ka central examination? Kaba mut 90 persen jong ki college ha ka jylla kim donkam satia ban ïakhun ïa ka common entrance examination,” la bynrap shuh shuh u Myntri Rangbah.
Ha kajuh ka por u la pynshai pat ba kito ki samla pule kiba kwah ban bteng ïa ki jingpule UG kiba don bynta bad ka skulbah NEHU ki donkam ban ïakhun ïa katei ka Entrance Test.
Katkum ka jingong jong u, ki samla pule ba kwah ban bteng ka jingpule ha kiwei ki skulbah jong ka sorkar pdeng lane ha ki college kiba don ha ki ar tylli ki campus jong ka NEHU kata ha Shillong bad Tura kata kum ka Law College lane ka Agriculture College ki donkam ban ïakhun ïa ka CUET.
