Shillong, Jymmang, 03: U Myntri kam pynroi sor ka Jylla ma Sniawbhalang Dhar ula ong ba ka por kan sa poi ba ka Sorkar Jylla kam don lynti pat da kumwei hynrei ban pyntreikam ïa ki Rules jong ki Aiñ ban ïoh ïa ki jaka theh ñiut ha kylleng ki jaka ka Jylla.
U Myntri ula pynpaw ïa kane halor ka jingeh kaba la kynton ïa ka sor Jowai na ka jingbym ïoh jaka theh ñiut mynta la bun bun bnai namar ka jingieng pyrshah jong ki paidbah ban bteng ïa ka jingtheh ñiut ha Mynkjai bad ban pynlong jaka theh ñiut ha Mooshutsdai kaba la dep ban ithuh da ka Sorkar Jylla.
“Ngin ïai pyrshang ban pynbeit ïa kane ka jingeh bad baroh ki kynhun hynrei ka por kan sa poi ba ka aiñ ka long halor ïa baroh” ong u ma Sniawbha haba ïakren bad ki nongthoh khubor.
Haba kylli ïa ka jingeh ka sor Jowai, u Myntri ula pyntip “Ngi (Urban Affairs) la dep ban ithuh ïa lai-saw tylli ki jaka bad ka jingpynkhreh kala ïaid shakhmat ban thied ïa kine ki jaka” haba bynrap “Ngi la kwah ban thied noh mar mar ïa kine ki jaka hynrei ngi hap ban bud ïa ki lynti”.
U Myntri ula pynpaw ïa ka jinglyngngoh balei ba ki paidbah ki pyrshah ïa ka jingtheh ñiut da kaba ong “Uei u ñiut, u ñiut um pat long eiei. Nga sngew ba ka jingpynjaboh ka kham jur na ki karkhana”.
“Namar kata, ka Sorkar Jylla kala pyrshang ban pynshai ïa ki paidbah halor kane ka bynta hynrei kan dei ka kam kaba shimpor” ula bynrap.
U Myntri u pyntip ba ka Sorkar Jylla kan ïaid kat kum ka Solid Waste Management Rule 2016 haba thied ïa ki jaka ban pynlong jaka theh ñiut bad ong ba ka Sorkar Jylla kan sa phah ïa ka Tnad Forest bad ka Tnad Urban Affairs ba kin leit jurip ïa ki jaka bala dep ithuh.
Haba kylli u, ma Sniawbha ula ong ba ïa mynta hi ka Sorkar ka kwah ban ïoh shuwa ïa ki jaka theh ñiut ba shipor namar ka sngewthuh ba ïa ka jaka theh ñiut ba shirta kan dei ka kam kaba slem ban pynbiang nadong hadong naduh ki jingker, ki jingpyndait ïa ki kor ki bor bad kiwei kiwei.
“Nga ngeit ba lada ngi ïaid kat kum ka jingstad saiañ ban pyndonkam ha ki jaka theh ñiut bad hadien ba ngi la dep ban pyndait ïa ki kor ki bor, dep ker ïa u pud u sam, yn ym don shuh ki briew ban pyrshah ïa ki jaka theh ñiut” ula ong.
Haba kylli ïa ka jingpynkynriah ïa ka jaka theh ñiut jong ka sor Shillong na Marten, u Myntri ula ong ba ka jing wad jaka kala ïaid shakhmat bad kala dep ruh ban ithuh ïa ka jaka hynrei kaba sah ka long satang ban thied ïa ka jaka.
“Phi tip ba ka shnong Kyrdem (Ri-Bhoi) ka pyrshah hynrei ngi la dep ruh ban ithuh sa ar-lai tylli ki jaka ban pynlong jaka theh ñiut ka nongbah Shillong” ula ong.
Haba kylli halor ka jaka theh ñiut ha Mynkjai, u Myntri ula ong “Kane ka kam mynta ka don hapoh ka jingbishar jong ka Ïingkashari. Ngam kwah ban ong eiei ïa kane ka kam”.
Halor ka jingsuba ba ka don ka jingleh politics ban pyrshah ïa ka jaka theh ñiut jong ka sor Jowai, u ma Sniawbha ula ong “Mano ba kwah leh politics, kito kiba kwah ïakhun elekshon, ai ba kin wan sha ka lympung ban ïakhun pyr shah ïa ngi, Balei ba kin leh politics ïa u ñiut. Ka jaka theh ñiut kam dei ka lympung ïakhun elekshon”.
“Ki dei ki nongthep vote kiba don ka bor bad ba lah ban jied ïa ki nongmihkhmat ba ki kwah ym ba ki ñiut kin jied ïa ki MLA ne MDC” ula bynrap.
