Shillong, Jymmang 4 : U bah John F Kharshiing u Working President ka Meghalaya State Olympic Assiociation (MSOA) u la pynpaw ïa ka jingsngew khia halor ka jingbym lah jong ka Assiociation ban pynbiang ïa ki jaka sah ki ba bha ïa ki nongïalehkai ba wan ban shim bynta ha ka Meghalya Game 2022. Halor kane ka jingjia u shim ka jingkitkhlieh halade hi.
“Na ka liang jong nga ,nga shim ka jingkitkhlieh bad nga pan map na ki nongïalehkai ba wan ban shim bynta ha ka Meghalaya Game namar ka jingmih ki jingeh ha ki jaka sah jong ki” la ong u bah Kharshiing.
Na ka liang u bah Kharshiing u la ïathuh ba na ka liang ka Assiociation ka klem pan ïa ka pisa na ka bynta ka jaka sah hynrei ka la shu pan tang ka bai bam, ka bai mattress bad ka bai blanket ,hynrei namar ka jingjur u slap ka mih noh ka jingeh ha kine ki jaka sah ki ba ju pyndonkam man u snem.
“Myn ha kane ka jingïakhun Table Tennis ka national game 400 ngut ki nongïalehkai ki sah hotel bad haba bishar ïa ka jinglut bad mynta haduh 2600 ngut ki khynnah ïalehkai, halor da leit sha olympic ruh kim pynsah Hotel hynrei kin phah sah ha ki game village bad kane ka jingmih ki jingbym hun ka dei ka ba ym poi pyrkhat bad ngi la pan map ïa kane”u la ong.
U la bynrap shuh shuh ba “ lada ap haduh da biang lut ki jaka sah la hap ban phah sangeh lut ki jingïalehkai haduh da ki phew snem.Lada ki pdiang ïa kaei ka ba ngi la pynkhreh ka pisa ba phah ka sorkar ka dap namar ba ngi la pynbiang domentry arrangement kum ba ju leh ha ki por ba la dep, bad haba kumne ka long te da long ka jingïalehkai biang ngim lah shuh ban pynsah ïa ki hangne” .
U bah Kharshiing u la pynshai ruh ba na ka liang jong u haba u la ïohi ïa ki dur ba la pynlait ha ki WhatsApp ,u la hiar hi ban leit jurip da lade ïa kane ka jaka.
“Nga la leit hiar hi ban lap ïa ka jingshisha halor ki jingmih ki dur ha ki WhatsApp bad shem ba kine ki jaka leit bar (toilet) ki ba ki khynnah ki la shon dur ki dei ki jaka ki ba ym long shuh ban pyndonkam”.
Ki ne ki jaka leit bar (Toilet ) ki dei kiba la teh bha da u tyllai bad thoh ruh da ka kot ban mana ban plie bad pyndonkam ïa kine ki jaka leit bar hynrei don na ki khynnah kiba la leit ban plie ïa kata bad shon dur .
Hynrei lait na kine ki jaka don bun ki jaka leit bar ki ba la dep ban pynkhuid bad ki ba la shna ruh sha bar kum ba ju long haba don kano kano ka jingïalang.
Halor ka jingshah kynnoh ïa ka jaka sah u la pynshai ba “Ka Indoor stadium hall ha Dalang ka dei ka jaka sah ka ba ju pyndonkam ban sah ki khynnah ïalehkai man ba don ka jingïalehkai bad namar ba u dei u bnai ba rang kam don jingktah eiei hynrei mynta ka kynti na ka daw ba don ka jingjur u slap ka la ktah jur ïa kane ka jaka sah”.
U bah Kharshiing u la kyrpad na ki khynnah kiba wan ban shim bynta ha ka ne ka Meghalaya Games ba kin ïatrei lang bad ka Assiociation khnang ba ka jingïalehkai kan ïaid bteng bad na ka liang ka Assiociation ruh kan ïaleh ban pynbha ïa kine ki jingbakla.
“Ngi sngew tynnad ba na ka liang ki nongïalehkai na kylleng ki District ki wan ban shim bynta bad kum ba ka sorkar ruh ka la shim khia ban bishar bniah namar ka North east Game ruh kan don nga shim ïa ka jingkitkhlieh ban pan map bad ngin nang pynbha shuh shuh halor kine ki jingbakla” u la bynrap.
