Nongstoiñ, Naitung, 19: Ka Kashari Special Judge (POCSO) ha ka sngi ba ar, ka la hukum ban set phatok haduh 10 snem ïa ki ar ngut ki runar kiba leh beijot ïa kawei ka khynnah 17 snem ha u snem 2021.
Kine ki ar ngut ki runar ki kyrteng u Shaiborlang Nongsiej bad u Judonlang Kharbani. Kine ki ar ngut ki la shah pynngat ha ka jingpynsajia katkum ka kyndon 4 (1) jong ka POCSO Act.
U Superintendent of Police ka West Khasi Hills, u la pyntip ba ki Pulit ka Nongstoiñ Police Station, ki la ïoh pdiang ïa ka ejahar ha ka 20 tarik Ïaiong 2021 na uwei u rangbah ba pyntip ba ka khun ba 17 snem ka la shah leh beijot ha kitei ki ar ngut ki runar.
Ka jingtohkit ïa kane ka case la pynkhamti ha ka Sub Inspector ka Women Police Kong L Siangshai jong ka Nongstoiñ Women Police Station kaba la charge sheet ïa kine ki ar ngut hapoh ka kyndon 3 (a)/4 jong ka POCSO Act.
Ka Kashari Special Judge ka la rai pynrem ïa kine ki runar bad hukum set phatok haduh 10 snem lem bad ka kumba mar T.30,000 kat kum ka kyndon 4 (1) jong ka POCSO Act.
