Bthah ka Sorkar Assam – Meghalaya ïa ki DC EJH bad Cachar ban leit jurip lang ïa ka khappud Baikam
Shillong, Naitung 19 : U Symbud Myntri Rangbah ka jylla, Bah Sniawbhalang Dhar ha ka sngi Balang u la ong ba la bthah ïa ki Deputy Commissioner jong ka East Jaintia Hills bad Cachar ba kin pynlong ka jingleit jurip lang ïa ka shnong Baikam kaba don ha khappud bad ban phah ïa ka kaiphod sha ka Regional Committee jong ka Meghalaya bad Assam.
U Bah Sniawbhalang uba dei ruh u Chairman jong ka Regional Committee halor ki jaka kajia pud, u la ïathuh ha ki lad pathai khubor ba ïa katei ka rai la shim ha ka jingïalang kaba long ha Umkiang dang shen hapdeng ki nongmihkhmat na ka Meghalaya bad Assam ban ïatai halor ka ishu khappud.
“Baroh ar ki DC jong ka East Jaintïa Hills bad DC kin pynlong ïa ka jingleit jurip lang bad phah ïa ka kaiphod kaba pura sha ki committee jong ka Meghalaya bad Assam. “Ngin (na ka Regional Committee) sa phah ïa ka kaiphod kaba pura sha la ki jong ki jong ki sorkar jylla bad baroh arngut ki Myntri Rangbah kin sa shim ïa ka rai halor kane ka bynta,” u la ong.
U la ïathuh ruh ba ka Baikam kaba hap ha Ratacherra section ka don kumba 37 tylli ki longiing bad ki dei na ka jaidbynriew Khasi -Pnar bad ïa mynta ka shnong ka hap ha Assam.
“Ki paidbah ki la ïoh lut ïa ki jingdonkam na Assam ha ki por ba la dep hynrei mynta ki kwah ban wan noh sha Meghalaya. Kumta ngi la rai ban phah ïa ki DC ban shim ïa ka report la ha kano ka liang ki kwah ban don, ha Assam ne Meghalaya,” u la ong.
U Symbud Myntri Rangbah ula ïathuh ruh ba ïa ka shnong Baikam ka la paw ha ka jingleit sorbe hadien ba la dep ban ïa soi ïa ka MOU hapdeng ka Meghalaya bad Assam ha u snem ba la dep, ha kaba la dep ban pynbeit haduh hynriew tylli ki jaka ba kajia pud.
“Hynrei ha katei ka kylla ba nyngkong ngim tip namar ym don satia mano mano ruh ba wan shangi,” u la ong.
Katkum ka jingong jong u, katei ka jingleit jurip lang ka long ban pyntikna ba kan ym don ka jingartatien halor katei kaphang bad ba ki sorkar kin sa shim rai katkum ka jingkwah jong ki paidbah.