Nongstoiñ, Naitung 17: Ka UHM West Khasi Hills hapoh ka jingïalam u President ka seng u Moonstar Nongrem ka la leit buh syntiew ha u mot jong u Tirot Singh Syiem, Syiem ka hima Nongkhlaw ha Mairang kum ka dak ka jingkynmaw burom ïa ka lyngkhuh sngi ïap kaba 188 jong une u riew khraw, u riew shlur, u khla wait ïaleh pyrshah ïa ki dohlieh khlem pyndep haduh ka sngi ka jingïap.
Haba ai jingkren ha kane ka sngi ka seng lyngba u samla bishar Rekon Thabah general secretary ka seng, u la ong ba u Paiem Tirot Sing Syiem u la ieng ban ïaleh pyrshah ïa ka sorkar phareng kaba synshar ha kitei ki por. U khlem pyndem wat ka jingïap kam shim la pynduh ïa ka mynsiem shlur bad u ieng ïaleh haka nongrim ban ïada ïa kane ka pateng, ban lait na ka jingshah teh mraw ha kiwei pat.
U la kyntu kynpham ïa ki para dkhot bad ïa baroh ba kane ka juk ka la dei sa ka kynti jong ki longdien ban bud ïa ki dienjat jong u khla wait ka ri, ban ieng tylli ka wei bad bad ban long ki samla kiba shlur kiba lah ban ieng skhem haka nongrim ban ieng ban ïada ïa ka Ri bad Jaidbynriew, na ka jingshah tyllep ha kiwei pat ki jaidbynriew.
Dei ban ieng ïada ïa ka jingshah tuh noh ïa ka hok longtrai man trai ha kiwei pat ki bor, kaba lah ruh ban long lyngba ki aiñ ki bapher bapher. U la ong ruh ka por kam pat dier ba kum ki khun ka Jaidbynriew ba kin shim noh ïa ka sien jam ban ieh shadien ïa ka jingbishni pihuiñ, ka jingïakdew kti bad peit matdong iwei ïa iwei ïa ki paradoh parasnam, hynrei ban ieng tylli noh kawei bad ban pyni ki Khun Khasi ki long kiba ïatylli bad kiba la khreh ban ieng ïada sha kiwei ba kum ïa la ka Ri ka Jaidbynriew. Ha kane ka sngi hadien ka jingkren, ka seng ka la pynlong ruh ïa ka jingsngap jar kaba shipor kum ka dak ka jingkynmaw ieit kynmaw burom ïa une u riew khraw bad u Khla wait ka jaidbynriew.
Ka Federation of Khasi Jaiñtia & Garo People (FKJGP) RL Iew Rambrai Unit, kum shi bynta ban rakhe ïa ka lyngkhuh sngi ïap ba 188 snem jong u Syiem Tirot Singh u khlawait jong ka jaitbynriew, ka la pynlong da ka penalty shootout ha Madan RL iew Rambrai sports club, ha ka ba 8 tylli ki team ki la wan ban ïa shim bynta, ha kaba ka iew Rambrai team ka la long ka lah duh bad ka shi paralok team ka la wan ba ar.
Ha kane ka sngi la ïoh ka jingïalang ba lyngkot bad la pynïaid ïa ka jingïalang da u bah Kipstar Kharbani President FKJGP RL iew Rambrai unit bad la ïadonlang u bah Jistarland Lyngkhoi president FKJGP Rambrai Circle kum u kongsan.
Haba ai jingkren u bah Jistarland Lyngkhoi president FKJGP Rambrai Circle, u la ong ba kum ki Samla Nongïalam dei ban kynmaw burom ïa ki kam ba khraw jong u Syiem Tirot Singh. Watla u la ïap 188 snem, hynrei kum ka jaitbynriew dei lyngba u Syiem Tirot Singh u ba la bsut ha ki longdien kumno ban shakri ïa ka Ri bad ka jaitbynriew lyngba ka jingieid, khnang ba ka pateng ba mynta bad ka ban sa wan kan ïai phyrnai.
U la ong ba ka jaitbynriew Hynñiew trep ka ïai donkam shibun ki khun samla ban ïai shakri ïa ka Ri bad ka jaitbynriew bad ban ïai kynmaw ïa ki Nongïalam ba khraw kum u Tirot Singh. Donkam ïa ki Samla ki ba ïai neh skhem kum ba u Tirot Singh Syiem u la ïai neh skhem, u ba lah ka ïap ha ïing byndi ban ïa ka ba long Syiem mraw.
