Ngi la jop ha ka jingïakhun ïa ka RP, dei ki aiñ kiba pynïap ïa ngi ki baduk : Ardent

Mairang, Naitung, 14: U President ka Voice of the People Party (VPP) u Bah Ardent Basaïawmoit u la ong ba dei da ki aiñ kiba la khñiot ïa u baduk bad dei ki aiñ ruh kiba pynïap ja ïa ki paidbah.
Haba kren ha ka jingïalang pynrung dkhot jong ka party ha Mairang, u Bah Ardent u la ong, lada bishar ïa ka jinglong jingman bad ki jingjia ha kine ki sngi ngi lah ban sngewthuh shai kdar dei da ka aiñ ba ka Sorkar ka khñiot beiñ ïa u baduk.
“Dei da ka aiñ, la hukum ban khang dukan 10:00 baje janmiet, dei ka aiñ kaba la hukum ban kamai kali da kata ka rukom Odd bad Even, dei ka aiñ kaba khang tih dewïong, dei ka aiñ kaba khang tih shyiap bad kumta ter ter bad ngi ïohi ba pleng ki aiñ kiba dei ban ai jingïada ïa ngi ki khñiot beiñ pynban na kata ka daw ngi donkam ban ïoh ïa ka Sorkar kaba don ka jingsngew bad ka jingpyrkhat ïa ki paidbah ban wanrah da ki aiñ ban long ka jingshngaiñ ïa ki ym ban khang lut katba don na kata ka daw ka VPP ka mih ban shim ïa kane ka bynta,” u la ong.
“Phin peit ha ka jylla la bun snem la khang pom dieng bad tih dewïong hynrei namar la pyntian jubor khlem da ai jinghikai bad ïoh jingïatreilang na u paidbah kam don kano kano ka jingmyntoi na bynta u paidbah hynrei tang na bynta ki katto katne,” u la bynrap.
U Bah Ardent u la ong ruh ba ka jingmih ka VPP kum ka seng saiñpyrthei ka long ban wanrah pat ïa ka burom ba la duh noh ka jaidbynriew bad ban tynrong ïa ka khia ka shon jong u paidbah.
“Lada nga pyrkhat tang ïalade shimet ngam donkam shuh ban dang pynmih seng saiñpyrthei hynrei ngan trei marwei na bynta ka Nongkrem nga lah ban leh kumta tangba ngi dei ban sngewthuh marwei katno ngut eh ngan lah namar ha ka synshar paidbah donkam ban ïoh ïa ka jingbun paid ban pynurlong ïa ki jingthmu bad ki jingangnud na bynta ka jylla bad phi lah ban ïohi ba ha ki jingïatai ki mat kiba nga rah ha ki snem kiba la leit watla nga jop ha ka jingïatainia hynrei ynda la poi ha ka jingïathep vote nga rem beit namarba ngam ïoh ïa ka jingbun paid na kata ka daw ngi la seng ïa ka VPP ka seng kaba don ïa ka thong kaba shai bad ki para nongïalam bad wat ki nongkyrshan ruh ki long kiba skhem bad kiba stad bad ngam ïohi jingartatien eiei ba ngin ïoh bat ïa u lakam synshar ha District Council ha u 2024 bad ha Assembly ha u 2028,” u la ong.
Haba kren halor ka jingdawa ban pynkylla ïa ka Reservation Policy, u Bah Ardent u la ong ba ka jingdawa kumba ka long mynta ka la urlong bad satang khyndiat por yn sa ïoh ban kheit ïa u soh ka jingjop.
“Shuwa ban wan ka VPP ym ju don ba nud mano mano ban kren halor ka Reservation Policy namar hana ka long “sensitive” than hynrei ka ngim ju riej ban kren ïa ka jingshisha bad mynta baroh baroh wat kito kiba pyntieng ïa ngi ruh ki kren lut ïa kane ka mat,” u la ong.
“Don lei kawei ka seng riewlum kaba la rim bha bad kaba dei ruh kawei na ki seng kaba khlaiñ tam ha ka jylla hynrei wat hadien ba ki la pynrung ïa kane ka mat ha ka Manifesto bad ki la leit sha u paidbah bad kular lada ki jop kin pynkylla ïa ka Reservation Policy hynrei ynda la thnam ka jingïakhih ka VPP ki dang hap ai ‘workshop’ ïa kita ki MLA kiba jop ïa kane ka mat kaba ki la kular bad sngewthuh kaei kata ka Reservation Policy ym kum ka VPP kaba la ïatai sani shuwa ban pynrung ha ka jutang elekshon jong ngi bad ngi sngewthuh shai ruh kaei kaba donkam ban leh,” u la bynrap.
Haba kren halor ka jingshah thngan ha jaka ïeng kali kaba don ha syndah ka Additional Secretariat dang shen u Bah Ardent u la ïathuh ba dei namar kum u nongïalam u shim ïa ka jingkitkhlieh ba u shim ïa kane ka sienjam, ‘bad ki doctor kiba wan eksamin manla ka sngi, ha ka sngi shah thngan kaba khyndai ki lap ba lada nga bteng shah thngan satang shisngi ne arsngi ruh ka lah ban jia kaei kaei kaba sniew ïa ka met jong nga haduh na ka Sorkar ka hap pyndem ha ka jingdawa ka jong ngi,” u la ong.
Ha kane ka sngi la ïoh ruh ïa ka jingkren na u Bah John Basaïawmoit uba dei u Organising Secretary ka Party ha Mairang, u MLA ka Mawlai u Bah Brightstarwell Marbaniang.