Jowai, Jymmang 02 : Ka Balang Katholik ka la ïoh phrungkhlieh ha shnong Borghat ha ka snem 1923 bad kan dap shispah snem ha u snem 2023. Kum ka jingpynkhreh ia kane ka jingrakhe jingdap shispah snem ka jingwan ka Balang Katholik ha shnong Borghat, Parish Ladlakadong la wan plie ïa kane ka jingpynkhreh rakhe Jubily da ka kong S. Shylla, ka kongsan bad u ma Joinriwel Pyrtuh Ex. MDC kum u symbud kongsan.
Ha kane ka sngi da ki spahngut ki para bangeit napoh ka Parish Ladlakadong bad na ki Parish ba marjan kum na Ladrymbai Parish, Amlarem bad Parish Khliehriat ki la ïawan ban sakhilang ïa kane ka jingplie pynkhreh jubili jong ka Balang Katholik shnong Borghat.
Ïa ka jingkñia Mass bakhuid la lamkhmat (kongsan) da u Phadar Ferdinand Dkhar uba long ruh u Diocesan Administrator ka Jowai Diocese ha ryngkat ki Lyngdohsohblei kiba wan na kiwei kiwei ki Parish ka Jowai Diocese bad na ka Diphu Diocese, Karbi-Anglong Assam. Ha shwa ban pynlong ïa ka jingkñia Mass bakhuid la pynher ïa ka Lama pynkhreh Jubili shispah snem jong ka Balang Katholik shnong Borghat da u Phadar Ferdinand Dkhar ha ka jingïasynranlang ki Lyngdoh sohblei, ki paidriewngeit bad ki riewkhmat ka thaiñ kiba la shah khot sngewbha.
Hadien ka jingkñia Mass bakhuid, ha ka nohphai sngi, la plie ïa u Mot jingpynkhreh jubili shispah snem ka Balang shnong Borghat da ka kong S. Shylla. Ka kong Shylla haba kren ha kane ka sngi, ka pynpaw ka jingkmen kaba khraw ba ka la ïohlad ban ïa kmenlang bad ki Para bangeit jong ka Balang Katholik shnong Borghat ha kane ka sngi plie jong ka jingpynkhreh jingdap shispah snem ka jingwan ka Balang Katholik ha shnong Borghat bad pynthikna ba kan sawan ban ïa donlang ha ka snem 2023, ka snem ban pynkut ïa ka jingrakhe jubili shispah snem.
Ha kane ka sngi la ïoh ruh ïa ka jingkren kyntu kynpham bad ka jingïatreilang ban nang pynkhraw ïa kane ka jingrakhe shispah snem jong ka Balang Katholik shnong Borghat da u Rangbah shnong ka shnong Borkhat, da u Dolloi ka Elaka Lakadong, u Phadar Anthony Peter, u Phadar Cresence Roy Laloo (Procurator ka Jowai Diocese), Fr. Valen Samson (Parish Priest ka Parish Ladlakadong) bad na u Symbud Kongsan ma Joinriwel Pyrtuh bad na ki riewkhmat ki kynhun Balang bapher bapher jong ka shnong Borghat.
La ïoh ruh ka jingpynbyrngi ïa ki paidbah da ki jingrwai bad ki jingshad tynrai na ki khynnah skul jong ka Borghat Cicle UP School bad na ka Seng longkmie.
Ha kane ka sngi u Symbud kongsan ma Joinriwel Pyrtuh u la pyllait paidbah ïa ka Cazett jingrwai Jubili bad ïa ki Tiket Lucky Draw bad kyntu ïa ki paidbah ban ïa thied ïa kine ki Tiket kum ka jingpynmih fund na ka bynta kane ka jingpynkhreh rakhe jubili jong ka Balang Katholik shnong Borghat ka ban pynkut ha u bnai February jong ka snem 2023.
Ïa ka jingkren pdiang burom bad pynïaid ïa ka programme da u ma D. Lyngdoh bad ïa ka jingkren ai khublei (vote of thanks) da u Secretary Balang, ka Balang Katholik shnong Borghat.
