Mih shakhmat ki nongñiah kali Tourist Taxi ha East Jaiñtia Hills ban leh test HIV

Khliehriat, Naitung, 02: Ki bor synshar jong ka East Jaiñtia Hills District hapoh ka jingïalam jong u Deputy Commissioner u Abhilash Baranwal, ha ryngkat ka jingïatreilang bad ka Mihmyntdu Community Social Welfare Association (MCSWA) ryngkat ka jingkyrshan lang jong ka Meghalaya AIDS Control Society (MACS) Shillong, ha ka sngi Saitjaiñ ki la pynlong ïa ka jingleh test ïa u khñiang jingpang HIV ïa ki nongñiah kali Touirist Raxi ha East Jaiñtia Hills District.
Kane ka jingleh test ka long ïa ki nongñiah kali kiba don ha ka shatri jong ka East Jaiñtia Hill District Tourist Association (EJHDTA) bad ka Kalaiñ Badarpur Association (KBA).
Ha kane ka kynti, ki dkhot jong kine ki Association ñiah kali, da ka mynsiem ba sngewkhia halor ka jingkiew jong ki briew kiba ïoh ïa u khñiang jingpang HIV ha East Jaiñtia Hills District, ki la ïashim bynta ha kaba phah Test ïalade ruh ha ka prokram ba la pynlong ha Mookhep.
Kane ka jingmih shakhmat jong kine ki nongñiah kali kamai ka long ban pynshlur ïa kiwei ruh ba kin mih lang shakhmat ban phah test HIV khnang ban dup tip ruh ïa ka jinglong jingman jong ka koit ka khiah ym dei eh tang ïa ka jingpang HIV.
Ki President jong kitei ki Association nongñiah kali ba kyntup u Bah A. Ryngkhlem bad u Bah H.Rymbai ki la ong ba ka long kaba bha eh ban pynlong ïa kum kine ki jingleh test bad kum ki Association ki kwah ruh ban pyni ba ki don ka jingkitkhlieh ban wanrah ïa ka bha ka miat hapoh ka district bad ruh ban pynlong ïa ka district kaba lait na u khñiang jingpang HIV bad kiwei kiwei ki jait jingpang.
Ki nongïalam jong kitei ki seng ñiah kali, ki la kyntu ruh ïa ki paralok bad ki dei ban kiar na ka shongkha pathar bad ruh ban da kynmaw ban sop da ki jingsop kti (hand gloves) haba don kano kano ka jingjia aksiden kali khnang bad lait na ka jingïabit ïa ka jingpang HIV bad ki da kyntu ïa ki nongñiah kali ba kim dei ban dih kyiad ha ka por ba ñiah kali ha ka por ba kit ïa ki nong shong kali bad ruh ba ym dei ban kit palat pud.
Ha kane ka Chekup Camp, la leh ruh ïa ka jingtest Blood Pressure, ka general Check up , ka test HEP-B bad ka C bad kiwei kiwei ki jingleh test na ka bynta kiwei kiwei ki jait jingpang.