Shillong, Jylliew 30 : U National President ka National People’s Party (NPP) bad Myntri Rangbah ka Jylla Conrad K Sangma mynta ka sngi Thohdieng, ula kyntu ïa ka Sorkar Pdeng ba kan shong bishar ïa baroh ki lad ki lynti bad ban leh eiei mardor ban wanrah noh ïa ka jingshongsuk ha Jylla Manipur.
Haba ïakren bad ki nongthoh khubor, u Conrad ula ong ba ka jinglong jingman ha Manipur ka dei kaba jyrwit jyrwat bha.
“Ki don shibun ki daw hangtei bad namar kane, ka Sorkar India kan hap ban shong bishar ïa baroh ki lad ki lynti bad kane ka dei kaba nga kwah ban ong bad ba kan leh eiei noh marmar hi” ula ong.
Haba pynpaw ba kano kano ka rai kan don beit ïa ki jingkylla bad ki jingktah, u Conrad ula ong “Kum ka party ka kwah ba ka Sorkar India kan shong bishar ïa baroh ki lad ki lynti kiba ïaid kat kum ki kyndon jong ka Riti Synshar ka Ri namar haba kut ka sngi, kum ka Political party ngi kwah ïa ka jingsuk bad jingsaiñ ba kan don..ngi kwah ba kiei kiei kin long biang kumba ju long baroh shikatta” ula bynrap.
Kat kum ka jingong jong u, ki briew ka Manipur kam pher ki dei na ki jaidbynriew aiu, ki la mad ïa ki jingjynjar bad jingsohsat ka jingim.
“Ki riew paidbah ki la mad ïa ki jingeh bad ka la don ka jingktah ïa ka jinglongbriew manbriew bad la donkam ban leh eiei ha ka ban pynjai jai noh ïa ka jinglong jingman bad ban wanrah biang ïa kiei kiei baroh kumba ju long baroh shikatta” ula ban jur.
