Shillong, Jylliew, 29: U MLA jong ka North Shillong Constituency u Bah Adelbert Nongrum ha ka sngi Palei u la phah da ka jingthoh sha ka Myntri ka Koit ka Khiah ka Sorkar Jylla ka Dr. Ampareen Lyngdoh ban pan jingpynshai ha kaba ïadei bad ka jingïoh duna shaba palat na ka bhah jong ka Central Government Health Scheme hapdeng ki nongtrei sorkar kiba rit kyrdan kiba dang shakri ha ka kam, kiba la shongthait bad ki ophisar kiba heh kyrdan.
Ha ka shithi, u Bah Adelbert u la pynkynmaw ruh ïa ka Myntri kaba la kular ban shimkhia ïa kane ka kam hadien ba u la rah ïa kane ka mat hapoh ka Ingdorbar Thawaiñ ka Jylla.
“Lah ban kdew hangne ba bun na ki nongtrei sorkar bad kumjuh ruh kito kiba la shongthait na ka kam, ki bym ïoh ïa ka bhah na ka CGHS halor ki Bill wat haba la mynjur da ka Directorate of Health Services (MI) ban bei ïa ki jinglut jingsep ha kaba ïadei bad ka jingsiew bai sumar ha ki hospital. Ki la phah da ka jingthoh ban mynjur biang ïa ka dor, namarba ka jingmynjur ïa ka dor ka long kaba rit shaba palat. Ka jinglut jingsep kaba bun kaba ki hap ban siew na ka bynta ka bai sumar ka la long ka jingkit kaba khiha na ka bynta jong ki. Nalor kata, ki jait jingpang ba ki mad ki ïakynduh jingeh ban siew ïa bai sumar ha ka dor kaba rem,” la ong u Bah Adelbert.
“Ka Sorkar lyngba ka Expert Committee ka la mynjur tang na ka bynta ki katto katne ki kyrdan jong ki nongtrei sorkar kiba bat ïa ki shuki kiba heh lane kiba trei ïa ki kyrdan kiba kham halor. Ka jingshah leh shiliang ka kren shai, ka jingpang hi kam pynïapher hapdeng ki parabriew, hynrei haba poi sha ka jingsiew pisa ka don pat ka jingpynïapher. Kam don kano kano ka kyndon ha ka MMA Rules, 2021 ban siew ïa ka pisa, kata, 80% lane 70%. Lymne ka don ka don ka kyndon ha ka MMA Rules, 2021 na ka bynta ban ka Expert Committe ka ban bishar bniah ïa kino kino ki jingjia kiba dei hok ban ïoh biang ïa ka jingsiew,” la pynpaw u Bah Adelbert.
“Namarkata……nga kyrpad ïa phi ban bishar biang ïa kane ka kam bad ban pynmih ïa ka hukum kaba mar ïaryngkat ha kaba ïadei bad ka jingsiew ïa ka pisa sha baroh ki nongtrei ha ki kyrdan bapher bapher bad sha kiba la shongthait na ka kam katkum ka kyrdan kaba ki bat. Shuh shuh, ym dei ban wanrah ïa ka jingpynïapher ha kaba ïadei bad ka pang ka shitom bad ka bha ka miat jong kiba dang shakri ha ka kam bad kiba la shongthait,” la kyntu u MLA ka North Shillong.
