Sngew diaw u myntri ka tnad pule puthi ba hiar ka jingstad bad jingshemphang ki samla pule

Shillong, Jylliew 29 : U Myntri ka tnad pule puthi u Rakkam A Sangma ula pynpaw ka jingsngew bynñiaw kaba khraw halor ka jinghiar ka jingstad bad jingshemphang jong ki samla pule ha ka jylla mynta la 13 snem lynter.
U la ong wat la ki samla pule ki don la ka sap ka talen hynrei kaba lyngngoh pat ka long ba ki samla pule na ki jaidbyrniew riewlum trai ri jongka jylla kim lah satia ban pass ïa ka Civil Services Examination. U Myntri u la ong da ka jingkiew ka teknoloji ki samla pule ki dei ban nang ïabeh ban kiew ha ki liang baroh bad ki dei ban ïa beh sha kata ka thong kaba kiwei ki samla pule ha ka ri ki ïa beh.
“ Ngi donkam ban ïar ki jingmut jingpyrkhat bad donkam ban ïabeh bad ki jingkiew sted jong baroh ki liang ha kane ka ri ym tang ha ki lynti syngkieng, ki jingpathai khubor hynrei khamtam eh ha ka liang ka pule puthi. Ngi donkam ban ïalong paralok bad baroh bad ki samla jong ngi ki dei ban ïakhun bad ïabeh sha kata ka thong jongka jingkylla” ong u Rakkam.
U la ong ban ïar ki jingmut jingpyrkhat ka long ban ïabeh ïa kaei kaba ki samla pule ha kiwei ki jylla kum ha Delhi, Gujarat, Bihar bad ter ter ki pule. Namar ha kane ka juk mynta kaei kaba ki pule ha Delhi lah ruh ban ïoh ha Shillong hynrei kaba kongsan tam ka long ban ban peit kaei kaba donkam ban leh namar kam pher lada don ha Shillong ruh lah beit ban ïoh ïa ki jingtip.
U Rakkam bad u nongai buit jongka tnad pule puthi u bah H.M Shangpliang ha ka Sngi Balang ki la leit jngoh ruh ïa ka Meghalaya Administrative Training Institute (MATI).Ha kane ka jingleit jngoh la ïadon lang ruh u MLA na Kharkutta u Rupert Marak.
Haba ïakren bad ki nongthoh khubor u Rakkam u la ong “ Ha kine ki san phew snem ba la leit noh ngim pat lah ban ïabeh ei ei kum ka jylla ha ki eksamin bapher bapher. Ngi don ki samla kiba tbit hynrei ka don kaei re kaei kaba pynwit ne long diengpyngkiang ïa ki donkam ban wad ïa ka daw ban jop ïa kine ki jingeh bad kum ki samla ruh donkam ban don ka jingkit khlieh”.
U la ong ba ka dei ka jingbah klieh bad kamram jong baroh ban peit ba ki samla pule jongka jylla ki dei ban pass bha ïa kia eksamin Civil Services. “ Uwei pa kawei la ki dei ki riew saiñ pyrthei, ki riewstad kot, ki kmie ki kpa, ki tnad pule bapher bapher ngi dei ban shim ka jingbah khlieh halor kane bad dei ban wad ki lad ki lynti kumno ba ngin ïaid shakhmat bad bad ki samla kin pass bha ïa ka Civil Services Examination”.
U la ong kiwei ki jylla kum ka UP, Bihar, Delhi, Gujarat bad wat ki jylla na kane ka thaiñ ki pass bha ïa kane ka eksamin hynrei ki samla na ka jylla kim paw satia.
“ Lada ki samla na kitei ki jylla ki lah ban pass bha balei ki samla jong ngi kim lah kumta ka donkam ïa ki samla pule na ka jylla jongngi ban shim khia bad phai khmat sha kane ka liang ban ïabeh ha kane ka jingïaleh ïa kane ka eksamination namar lada ym don ba pass na ka jylla kin wan kiwei ki jaidbynriew na kiwei ki jylla ban synshar bad pynïaid ïa ka jylla kaba long ka jinglehraiñ kaba khraw haduh katta katta ïa ka jylla bad ïa ki jaidbynriew trai ri trai muluk ka jylla”.
U la ong na ka liang ka sorkar ka la pyrshang katba lah ban ïarap ïa ki samla pule ba kin pass ïa kane ka eksamin Civil Service bad ngi pynshlur ïa ki ba kin trei shitom shuh shuh ban pass bha.
Ha ka jingïakhun kaba la dep ki don lai ngut kiba la pass ïa ka Prelims kine ki long Nidakyrkhu Dkhar, Anmiel Azareel Syiem bad Thomas Edison Sumer. Kine ki la ïoh ka jingïarap bad jingpyntbit na ka All India Services Pre Examination Training Centre ha MATI.