Shillong, Jylliew, 28: Ka Hynñiewtrep Youths Council (HYC) Sohïong Circle ha ka sngi Balang ka la aiti da ka jingthoh ba kyrpad ïa ka District Election Officer (DEO) jong ka East Khasi Hills District ka Kong R.M Kurbah kaba long ruh ka Deputy Commissioner (DC) jong ka District ban thoh sha ka tnat Election jong ka Sorkar Jylla ban ym shah shuh ïa ki khynnah rit ban pyndonkam ha ki elekshon.
Kane ka jingpynsngew jong ka HYC ha ka DEO ka long shwa ba ka jylla kan leit sha ka elekshon MDC bad ka elekshon MP ki ban sa long ha u snem 2024.
“Ka jingpyndonkam da ki seng saiñpyrthei, ki kmie ki kpa bad kiba la san ïa ki khynnah rit ha ka elekshon ka wanrah ïa ki jingjia basngewsih khamtam ha ka jingshad ïalap elekshon teng teng ki shah tynrah ha ki kali, ki shah lymbuh ha kiba heh, ka wanrah ka jingsngewsih bad ka jingmynsaw,” ong u President ka HYC-Sohïong Circle u Bah Purningstar Shabong ha ka jingïakren bad ki lad pathai khubor.
U la ong ruh ba ka seng ka la aiti ruh da ka jingthoh ha ka DEO ban ym shah shuh ïa ki khynnah rit ba kin ïashim bynta ha ki rally bad ha ki jingïalang kiba ïadei bad ka kam elekshon.
U la ïathuh ruh ba kane ka jingujor jong ka seng sha ka DEO ka long hadien ba ka Seng ka la pynshong nongrim katkum ka shithi ba la thoh da ka Chairperson jong ka National Commisision for Protection of Child Rights (NCPCR) ha u snem 2017 ba la phah sha ka Election Commission of India (ECI) ba ïa ki khynnah rit khamtam ïa ki khynnah kiba dang hapoh 14 snem ka rta ym dei ban ailad ban ïashim bynta ha ki kam elekshon.
Une u nongïalam ka HYC u la ïathuh ruh ba wat ka Election Commission of India ka ladep phah da ka shithi sha ki seng saiñpyrthei bad sha ki Chief Secretary bad sha ki Chief Electoral Officer (CEO) jong ki Jylla ban bthah ba ym dei ban pyndonkam ïa ki khynnah rit ha ki kam elekshon namarba kane ka long pyrshah ïa ka hok jong ki khynnah katkum ka Protection of Child Rights Act, 2005.
Haba kylli, u Bah Shabong u la ïathuh ba ka DEO ka la kular ban sa pynsngew ïa ka jingujor jong ka seng sha ka tnat Electon jong ka Sorkar Jylla.
