Ban tehlakam ïa ka jinglait tuh yn pdiang ka KHADC tang lyngba ka jingsiew Online ïa ka professional tax

Shillong, Jylliew 28 : Ka Khasi Hills Autonomous District Council (KHADC) kala rai ban pyntreikam noh da ka jingsiew online ïa ka professional tax khnang ban tehlakam ïa ka jinglait ei ki khajan ba ka KHADC ka dei ban ïoh.
“Ngi la rai ban tyrwa ïa ka jingsiew online ha kaba ha ka reciept kan don ki QR Code khnag ban ym lah shuh ban leh thok da mano mano ruh ha kaba ïadei bad ka jingsiew ïa ka professional tax sha ka Council” ong u CEM ka KHADC Bah Pynïaid Sing Syiem haba jubab ïa ka motion ha ka sngi pynkut ïa ka dorbar lyiur jong ka Council ha ka sngi Balang.
U la ïathuh ruh ba ha u snem ba la leit ka council ka la ïohlum palat T. 13 klur ka professional tax.
“Ka jingpyntreikam ïa kane ka rukom siew ba thymmai kan ïarap shikatdei eh ban tehlakam ïa ka jinglait tuh ka khajna bad ngi kyrmen ba kane kan ïarap ban nang kyntiew ïa ka jingïoh lum ïa ka professional tax sha ka T. 20 klur namar da kane ka buit thymmai yn ym don mano mano shuh ban lah ban leh thok”, u la ong.
U pyntip baka Executive Committee kan sa khot mardor ïa ka jingïalang jong ka Tnad na ka bynta ban pyntreikam noh ïa kane ka rukom treikam ba thymmai.
Kat kum ka jingong jong u, ka Council ka don jingthmu ruh ban pyndonkam noh da ki kor Computer ha kaba buh jingkheiñ jingdiah jong baroh ki tnad pynmih pisa jong ka Council.
Shuwa kane haba kyrshan ïa ka motion ba la wanrah da u MDC ka Nongpoh Bah Balajied Rani bad u Nongïalam ka Liang Pyrshah Titosstarwell Chyne ula ong ba ka khajna ba la lum khajna naka profession tax ka la kot T. 13 klur hynrei kane ka rukom lum khajna ba mynta ka dei kaba pynshlur ïa ka jinglait tuh ki khajna.
“Namar kata, nga sngew ba ngim dei ban pynshlur ban siew ïa ka professional tax da ka pisa. Nga kyrpad ïa ka Executive Committee ban khmih sani bha ïa kane ka kam” ula ong.
Halor ka kam ba ïadei bad ka jingai Trading Licence, u CEM ula ong ba ka tnad Trade jong ka Council kam dei ïa kaban peit kum ka tnad pynmih khajna.
“Namar lada ngi ong ba ka Tnad ka dei na ka bynta ka jingpynmih khajna, kam mut ban ngin hap ban ai Trading Licence sha baroh kiba wan applai naka Council” ula ong.
U bah Pynïaid ula ong ba ka EC ba thymmai kala rai ban nang pynkhlaiñ ïa ka tnad Enforcement jong ka tnad Trade.
“Ngim dei ban ailad ïa ki Pulit Enforcement ba kin shu shong ha Ophis hynrei kin pynthikna ba kin leit sha ki jaka iew ban talasi ïa ki kam khaïi ba be-aiñ” ula bynrap.
Ha kajuh ka por, u CEM ula ong ruh ba shen un sa khot ïa ka jingïalang bishar kam bad baroh ki Tnad khnang ban lah pynjanai ïa ka jingtreikam jong ka Council.