Ujor ka FKJGP ïa ka rukom shna jingkieng ha Nonbah ba tieng ïoh kylla jingkieng Dwar Ksuid

Nongstoiñ, Jylliew, 28: Ka Federation of Khasi Jaiñtia & Garo People (FKJGP)Nongstoiñ Circle, ka la leit ban ujor pyrshah ïa ka rukom shna ïa ka jingkieng sha ka surok National Highway kaba don ha Nonbah Nongstoiñ, namar ka jingsheptieng ïoh ka kylla long sa kawei ka jingkieng jong ka surok Shillong Bye-Pass kaba don ha Dwar Ksuid.
Ka FKJGP Nongstoiñ Circle ba la synran lang da u President ka FKJGP West Khasi Hills Bah Chandra Nongdkhar, ki la leit ban ïakynduh markhmat ïa u Executive Engineer ka PWD Nongstoiñ ban ujor ïa ka kane jingkieng, namar ka jingima jong ka rukom shna, kaba lah ban buh jingma pynban ïa ki paid nongleit nongwan lashai lashisngi.
Kane ka jingkieng ka dei kaba pynïasoh ïa ka surok ban rung sha sor Nong-stoiñ bad ka surok National Highway.
Kane ka jingujor ka la mih hadien ka jingshem na ka jingleit jurip, ba ïa kane ka jingkieng la shna da kaba kyntur sha ka wah ka ban pynthut ne pynrit ïa ka lynti ïaid jong ka Wah, khamtam ha ka por lyiur ba kiew um kane ka wah, kaba lah ban ktah bad wanrah jingmynsaw pat ïa u paidbah ha ka leit ka wan.
Ka jingsheptieng ka long ba ïoh kane ka jingkieng kam lah kyrda ïa ka bor jong ka Umsaw jong kane ka Wah ha ka por lyiur, kaba lah ban khlong ïa ka khyndew ban pynlong lynti ïaid bad pynshong synjor noh ïa ka jingtei baroh.
Ka FKJGP ka sheptieng ba ïoh kane ka jingkieng ka kylla long kum ka jingkieng jong ka surok Shillong Bye-Pass kaba la shong synjor tang katto katne snem namar ka jingkhlong lynti ka wah Umïam.
Ha ka jingïakynduh ïa u Engineer, la ïathuh ba une u Heh Sorkar u la pynpaw ba ka tnad PWD kam lah leh eiei satia halor kane ka jingpynsngew ka seng, namar ïa kane ka jingkieng la pyntrei da ka National High Authority of India (NHAI).
Halor kane, ka Seng ka la rai ban sa leit ïakynduh ïa ki bor khmih ka NHAI, ban dawa ba ka dei ban pynbeit ne design thymmai biang ïa kane ka jingkieng, khnang ba kan long kaba shngaiñ ïa ka leit ka wan u paidbah.