Nongpoh, ïaiong 30: U MLA ka Umsning Constituency u Bah Jason S Mawlong mynta ka sngi u la lah ban plie paidbah ïaka sem ap kali (Passenger Shed) haka shnong Iewmawlong bala tei da ka Nongpoh Town Committee lyngba ka Grand In Aid Scheme ka tnad Urban Affairs haka jinglut kumba 2.10 lakh.
La sakhi ruh ha katei ka sngi ka jingplie ïa katei ka sem ap kali da ka jingdonlang u Bah S Langstieh Engineer ka tnad Urban Affairs, Bah Rayonald Kharkamni Secretary ka Nongpoh Town Committee, Bah Clement Lyngdoh Finance Secretary, Bah Vicky Syngkli Rangbah Shnong ka Iewmawlong, Bah R Warjri Rangbah Shnong Mawdiangum bad kiwei kiwei.
Haba kren ha katei ka sngi naka liang u Bah Jason Sawkmie Mawlong u la pynpaw ka jingsngewkmen ba wan ki kam pynroi haka thaiñ khamtam ka jinglah ban plie ïaka sem ap kali wat ka dei kaba rit hynrei kalong pat ka jingmyntoi kaba khraw iaki paidbah ha katei ka thaiñ khamtam haka sngi iew ba ki paidbah na kylleng ki jaka ki ioh ban shong jahthaid haka por ba ap kali ban rieh ruh naka sngi u slap.
Kum u MLA u la kyntu ruh iaki paidbah ban pyndonkam hok ia katei ka sem ap kali ban sumar iaka naka bynta ka jingmyntoi jong ki paidbah ba bun ba lang bad naka liang u MLA u la kular ruh ban thaw ki lad ki lynti ban pynbha iaka Iew kaba don haka shnong Iewmawlong ban wanrah iaka khuid ka suba bad ka jingitynnad.
