Khliehriat jylliew 26: Ka Seng Hynñiewtrep Youths’ Council (HYC) EJH bad ka Jaiñtia Youth Federation (JYF) EJH, ki la phah da ka jingthoh sha u Executive Engineer, Khliehriat Distribution Division MePDCL, EJHD, Khliehriat na ka bynta ban pan jingpynshai halor ka jingïai bteng ban pyntreikam ïa ka jingpynlip bording ne load shedding hapoh ka district wat hadien ka jingbiang ha ka jingdon um bad ka jingïoh slap kaba biang kumjuh ha kaba ïadei bad ka jingkiew jong ka bai bording ilektrik wat hadien ka jingduh bording ba khah khah jong ki nongshong shnong.
Haba pynpaw ka jingsngewkhia halor kane ka jinglong jingman, kine ki ar seng ki la pynpaw ba ki sngewthuh halor ka jingeh namar ka jingbym don um bad ka jingbym ïoh ïa u slap uba biang naduh kine ki khyndiat bnai ba la dep kiba long ka daw jong ka jingbym lah ban pynbiang bording hapoh kane ka district bad ha ka jylla hi baroh kawei.
Hynrei, ki la pynpaw ba kumba ka long mynta ka jingdon jong ka um ka la biang hadien ka jingïoh ïa u slap uba biang naduh kine ki khyndiat taïew ba la dep.Kumta kane ka jingiai bteng ban pynlip bording kala pynlyngngoh ïa ki kum ki sengbhalang kumjuh ïa ki nongshong shnong kaba la pynthut ruh ha kaba ïadei bad kiba bun ki jingtreikam kiba man ka sngi.
Ha kajuh ka por u kyrwoh lyngba u Bah Preios Pale bad u Bah John Pala president ka HYC bad ka JYC bad ki la pynpaw ruh ka jingsngewkhia kaba jur ha kaba ïadei bad ka jingkiew jong ka bai bording ilektrik wat hadien ka jingbym ïoh thikna ïa ka bording kaba la ktah jur ïa ki nongshong shnong.
Kumta ruh na ka liang kine ki ar seng ki la pan ka jingpynshai lyngba ka jingthoh hapoh ka 10 sngi ban pynpaw halor katei ka mat ba la kdew.Nalor kata ki la pynpaw ba kane ym tang ba kan pynshai halor katei ka bynta hynrei kan ïarap ruh ban weng ïa ki jingklumar jingmut jong ki nongshong shnong.
Shuh shuh ki la ong ruh ba ka long kaba donkam ïa ki nongshong shnong jong ka East Jaiñtia Hills bad ïa ka jylla hi baroh kawei ba kin tip bad sngewthuh ïa ka jinglong jingman bad ban ïoh ïa jingshaniah halor ki sienjam ba la shim ban kyntiew ha kaba ïadei bad ka kam sam bording.
