Nongstoiñ, Ïaiong, 30: Ka jingpynlong ïew ha ki ar jaka ha Langpih man ka sngi thohdieng, ka la pyntlot ïa ka khaïi ka pateng ka ïadie ïa thied, namar ki paidbah nongleit ïew leit hat, ki siew ki tda ym tang na kawei ka jaka, hynrei ki leit siew leit tda na baroh ar jaka, khyndiat na kawei ka jaka bad khyndiat na kawei ka jaka. Nalorkata kiba bun ki nongthied nongpet na kitei ki ïew ki dei ki Khasi ba kynthup naduh ki nongshong shnong ha katei ka thaiñ bad ki bym dei na katei ka thaiñ ruh.
Lah ban kdew hangne ba ka jingdon jong ki ar tylli ki ïew ha katei ka jaka, kata ka ïew kaba la seng da ki Khasi naduh ki phew snem bad kawei pat ka dei ka ïew kaba la seng da ki Nepali katto katne bnai mynshuwa, ka dei tang hadien ba ka sorkar ka la pyntreikam ïa ka khangdam.
Ha kaba ïadei bad ka jingdon jong kitei ki ar tylli ki ïew, ki rangbah Khasi kiba dei ki nongpynïaid ïa ka ïew Langpih, ki la ong ba ki la pyntip sha ki nongpynïaid jong ka ïew ba la seng da ki Nepali, ba kin ïakynduh lang bad ban ïakren ba ka jingpynlong ïew ha kajuh ka sngi kam long kaba sngew tynnad, namar ka thied ka pet ka tlot ha kawei ka liang bad ka khlaiñ ha kawei pat ka liang.
Kumta na ka bynta ba baroh ar tylli ki ïew kin ïaid bha, ki la kyntu ïa ki nongpynïaid jong ka ïew ba la seng da ki Nepali ba kin pynkylla bad kin pynlong noh ha ka sngi lah sngi u Blei bad ka ïew jong ki Khasi pat ka long beit ha ka sngi thohdieng kumba ka ju long namar ba la pynbeit naduh ba la sdang ban seng.
Kitei ki rangbah ki la ong ruh ba ka jingïakren kam shym la poi shaei shaei namar ba na ka liang ki nongpynïaid ïa ka ïew jong ki Nepali, ki la ong ba kim lah shuh ban leh ei ei, namar ki la dep pynbit pynbiang ïa ki kot ki sla sha ka sorkar Assam ba katei ka ïew kan long beit ha ka sngi thohdieng. Ki la ïathuh ba na ka bynta ban pynlong ïa katei ka ïew ki hap ban siew shuwa ïa ka khajna sha ka sorkar Assam haduh hynriew phew hajar tyngka.
Haba twad jingmut na ki katto katne ki nongshong die jingdie kiba wan kit ïa ki mar ki mata na Assam, ki la ïathuh ba ki pulit Assam kiba don ha Langpih ki ju wan khang lynti ïa ki ba kin leit sha ka ïew ba la seng da ki Khasi bad kim shah wat ïa ki kali ba kin leit buh ïa ki mar ki mata. Nalorkata ki la ïathuh ruh ba lada ki phet na katei ka ïew jong ki Nepali, ki dawa ba ki dei ban siew haduh lai phew hajar tyngka uwei u nongdie jingdie.
