Lyngïong, Jylliew, 25: Ka Destiny Self Help Group (SHG) kawei na ki SHG jong ka ka shnong Umkaber ba hap ha ka Hima Lyngïong Lyngdohship ha ka 24 tarik u Jylliew, 2023 ka la plie paidbah ïa ka jaka sah pyngngad bad kane ka dei ka sien ba nyngkong ha ka them Lyngïong Tyrsad ban plie ïa kum kane ka jaka sah pyngngad.
La plie paidbah da u bah Tambor Lyngdoh uba mihkhmat ïa ka Synjuk ki Hima Arliang Wah Umiam Mawphlang Welfare Society (SKAWUMWS) ha ka jingdon ryngkat u bah Staising Kharbteng uwei na ki ‘riew rangbah ba pawkhmat ka thaiñ, ki Nongïalam Shnong, ki Nongïalam bad dkhot ka Destiny SHG.
Ha ka jingkren u bah Tambor Lyngdoh kum u kongsan u la ong ba ka Synjuk ka pynshlur ïa ki paidbah nongshong shnong ban shim kabu ïa ki lad ki lynti ba ki ioh kum kine ki kam ban pynshlur ïa ki briew ka thaiñ ban ïeng ha la ki kjat ha ki kam la jong da kaba ai khublei ïa ka Destiny SHG kaba la long ka nuksa ba paka na bynta kiwei ruh ki kynhun ïatreilang.
U bah Staising Kharbteng u la pynpaw ba ka dei ka sien ba nyngkong ha ka thaiñ ban ïoh ïa kum kane ka jaka sah pyngngad bad kyrmen ba kane kan ïarap ïa ki nongjngohkai pyrthei ban ïoh ïa kum kane ka jaka sah pyngngad haba ki wan jngohkai ïa ka thaiñ bad kan ïarap ban kyntiew ïa ka ïoh ka kot ki longkmie bad ki longïing longsem.
La ïoh ïa ka jingkren na u bah Bruce Hadem uba dei u Rangbah Shnong ha ka jingïadon kiwei kiwei ki ‘riew rangbah bad dkhot ka Destiny SHG.
