Ka imlang sahlang ha kine ki sngi ka la nangpher nangpher shisha katba nangïaid ka por. Kane ka dei ka juk kaba lehse bun ki riew rangbah bad ki tymmen kim shym la poi pyrkhat ba kan jia ha kane ka rukom. Lehse ka rukom pyrkhat jong kiba bun ki longshuwa man shuwa ka long ba ha ba u khun bynrtiew u la nangriewspah te ka jingsuk kam bud bad ka imlang sahlang kan long kaba khambit khambiang bad ka por kan long kaba kham kylluid. Hynrei kane kam shym la long satia kumta namar kane ka juk kaba ngi im mynta la iohi shai kdar bad ymlah ban len ia ka jingshisha ba katta katba nangriewspah katta ngi la nangkylla duk. Ka jingmut jong kane ka long ba kumba ka jingstad ka ioh ka kot ne economics wisdom ka la batai lupa ba ka jingkwah jong u briew kam don pud ne kam ju kut (human wants are unlimited), hangne baroh ngi iohi ia ka jingshisha.
Don bun bah ki briew kiba la pahuh pahai bad kiba la riewspah shisha, bad lehse ha ka rukom pyrkhat jong ki longshuwa man shuwa, kine ki briew kin kham lait na ki jingbun kam than bad kin kham ioh ka por kaba kylluid ban synniang sha ka jingbha ka longiing longsem bad ka imlang sahlang, hynrei kam long kumta. Niuma ki lah ban don khyndiat eh kiba sngewthuh ia kane, hynrei ka pyrthei salonsar kam long kumta. Ha kine ki sngi nga sakhi ba katta katba ki longiing longsem ki nangriewspah hynrei katta ki khun ki kti ki nangduh nong namar ba kim ioh bha ia ka jingsneng jingkraw kaba biang na ki kmie kpa. Bun ki kmie ki kpa ki bunkam ban kamai bad pynbiang ia ka jingdonkam jong ki khun jong ki, hynrei kim poi pyrkhat ba ki khun ki donkam ruh ia ka por jong ka jingiasyllok bad ka jingsneng jingkraw khnang ba kin lah ban iaid sha ka lawei kaba skhem ha ka imlang sahlang.
Ha ki por kiba kham mynshuwa naduh ki samla haduh ki rangbah ki dang iadon ka por ban kit ban bah wat ia ki kam shnong kam thaw. Naduh ki seng samla haduh ki kam kit ia ka shnong ka thaw, hynrei mynta bun ki samla bad ki rangbah kim don por shuh namar ka jingiabeh palat ia kata ka jingbit jingbiang. Katta katba nangriewspah katta ka por ka la nangkhim wat para marjan ruh ym don por shuh ban iatei iasyllok bad iamir jingmut na ka bynta ka bha ka miat.Teng teng shu kyndit thret ban tip ba la jia ei ei kaba sngewsih ia ki para marjan marpa namar ba ym ju tip ei ei shuh na ki daw jong ka jngbunkam palat.
Naduh ha kaba iadei ha ki kam shnong, kam Balang bad ruh kam bhalang la eh ban ioh ia ka por jong ka jingiatei iasylok namar ka jingiabeh palat sha kata ka kyrdan rukom im ka juk mynta ne ka standard kaba ki ong ha ka ktien phareng. Ka long kaba eh than ban kdew kti ia ki riew shimet ne ka imlang sahlang ha kaba iadei bad kane, hynrei ka jingkylli ka long hato kaei ka jingpyrkhat jong ki seng trei mon sngewbha, ki shnong ki thaw bad kamtam ki Balang Khristan ki pyrkaht halor kane. Hooid kaba phai sha ka pyrthei sepngi, ngi ainguth ia U Blei ba kane ka ri bad ka shnong kaba ngi im ka dang bha shibun eh. Namar haba peit sha ki riew sepngi la iohi ba ka dujok ka la kiew skong shisha bad ki la mih ki kynhun jong ki briew kiba ym ngieit shuh wat ha U Blei nongbuh nongthaw ruh, ki briew kiba shim ia ka jingim ba awria kum ka jinglaitluid kat haduh ban ia awria para shynrang kumjuh ruh ki kynthei para kynthei, wat don ruh ki briew kiba awria bad ki mrad bad ka jingim ka la long kaba kynsha shisha haduh katta katta.
katta katba nangriew spah katta ngi la nangduk naduh ka riam ka beit ka akor ka burom, ki samla kynthei ha kine ki sngi ki riam la kumba khlem phong jain ei ei ruh em. Ki samla mynta ki la sdang wat ban ngam ha ka bih jong u drok bad ka jingim kam long shuh kaba thikna hynrei ka imlang sahlang ka la shongsyier. Kum kine ki jingjia kim dei datia kiba dang shujia shi miet shi miet, hynrei kiba la kyan la bun bun por bad ki la iohbor mynta. Ia ka jylla Meghalaya la tip kum kata ka jylla Khristan ne ka Christian State, hynrei ka jingkylli ka long aiu ki Balang ki la leh ha kine ki sngi, katba ki briew kiba long khristan ki la nangbha nangmiat bad nangriewspah hynrei kiba bun kiwei pat ki nangjot nangjot bad ki nangngam ha ki jingeh hato lada ym dei ki Balang Khristan ki ban ieng bad ai ka jingkyrmen mano kien ban leh ia kata ?
Ka long kaei kaei kaba lyngngoh bad pyniduh jingkyrmen ban iohi ia ki jingjia kiba ktah wat ia ka burom jong ki Balang Khristan hi, dang ha kane ka taiew ki paidbah ki la sakhi ia ka jingjia ba iadei bad ka Robert Hospital. Katno ka long ka nuksa bym itynnad khamtam lei ba kane ka Hospital ka dei kaba la rim tam hapoh ka Jylla bad kaba la ai shisha ia ka jingshakri sha ki paidbah. Kane ka pyni ba katba nangmih ki sngi ka jingiabeh palat sha kata ka jingbit jingbiang shimet ngi lehklet noh ia ka jingshakri sha ki para briew kaba ki ju ong ka long ka jingshakri ia U Blei.