Rai ka KHADC ban bteng ïa ka jingkhynra Trading License ïa ki bar jylla

Shillong, Jylliew, 23: Ka Khasi Hills Democratic Front (KHDF) hapoh ka jingïalam jong u Bah Pynïaid Sing Syiem kum u Chief Executive Member (CEM) kaba dang shu shimti ïa ka Executive Committee kaba thymmai hapoh ka Khasi Hills Autonomous District Council (KHADC) ka la rai ban bteng ïa ka jingkhynra Trading License pyrshah ïa ki bar jylla kiba leh ïa ka khaïi ka pateng hapoh u pud u sam jong ka Council.
“Ka Executive Committee ka la rai ban bteng ïa ka jingpyntreikam ïa ka Trading by Non-Tribal Regulation Act ban khynra ïa ki bar jylla kiba wan khaïi hapoh u pud u sam jong ka KHADC, la ka long ïa ki nongkhaïi kiba rit ne kiba heh bad ki bym don ïa ka Trading License yn shu phah lut ïa ki jingtreikam jong ki,” ong u Bah Pynïaid Sing Syiem ha ka jingïakren bad ki lad pathai khubor ha ka sngi Thohdieng.
“Kane ka EC kan long kaba pyrkhing bha ïa ki jingkhynra ïa ki bar jylla kiba wan ïa ki kam khaïi pateng ki bym don ïa ki kot ki sla kiba biang bad ki bym burom ïa ka Council ban pan ïa ki laisen,” u la ong.
Ha kajuh ka por u la pyntip ba ka EC ka la rai ban pynlong biang ïa ka Dorbar Mang Tyngka jong ka Council ka ban sdang naduh ka 24 tarik haduh ka 28 tarik u Jylliew, 2023 hadien ka jingïasyllok bad u Chairman jong ka Council.
U Bah Pynïaid u la ong ba ha kane ka dorbar yn sa wanrah ruh ïa ka Rule kaba la tip kum ka Khasi Hills Autonomous District Council Service Amendment Rules 2023 ban pynbeit thymmai ïa ka rta rungkam jong kino kino ki nongthepkam ka ban long beit 37 kumba leh da ka Sorkar Jylla.
Shuh shuh u la ïathuh ba ka Executive Committee kan wanrah ruh ïa ka jingpynbeit thymmai ba nyngkong eh ha Khasi Hills Automous District (Protection of Khasi Traditional Medicine) 2023 bad ïa ka Bill kaba ïadei bad ka Khasi Hills Autonomous District Members Pension Bill kaba dei ka Repeal Bill, 2023 ka Executive Committee ka la rai ban pynsangeh shwa shipor ban bishar bniah bin pa bin da ka Select Committee.
U la pyntip ruh ba ka Executive Committee jong ka Khasi Hills Autonomous District Council ka la shim ïa ka rai ban pan jaka na ka Sorkar Jylla ha New Shillong na ka bynta ban pynkynriah noh ïa ka ophis treikam jong ka District Council na ka jaka treikam kaba don mynta.
“Kumba ka long mynta kane ka jaka treikam ka la khapngiah shaba bha bad ka la pynwit bha ïa ka jingtreikam jong kiba bun. Kumba phi tip ka KHADC ka don lai tylli shnat treikam ba kynthup ïa ka Executive, ka Legislative bad ka Judiciary,” u la ong.
U la ïathuh ba kane ka jingthmu ban pan jaka na ka Sorkar ha New Shillong ka long ban pynsuk ïa ki paidbah ha ka leit ka wan hadien habud.