Shillong, Jylliew, 23: Ka Sorkar Jylla kaba la shong ïa ka jingïalang pyrkhat kam lane ka Review Meeting halor ka jingkhyllem jong ka kynroh ha PA Sangma Stadium, Tura ha ka step sngi Palei ka la lap ba kane ka jingjia ka dei na ka jingsahkut jong ka nala um kaba don marsyndah bad kane ka kynroh.
U Myntri Rangbah ka Jylla u Conrad Kongkal Sangma ha u kyrwoh video ba la phah sha ki lad pathai khubor ha ka sngi Thohdieng u la ïathuh ba katkum ka kaiphod tohkit ba la aiti da ki Engineer bad u Contractor ki la pyntip ba ka jingsahkut jong ki synrum jaboh hapoh ka nala ka dei namar ka jingshna ïa ka Indoor Stadium kaba la mang pisa T. 70 klur eiei.
“Ki don ar tylli ki bynta jong ka jingshna ïa ka Stadium, kawei ka bynta ka dei ka jingshna ïa ka madan ïalehkai phutbol kaba la mang pisa kumba T. 50 klur kaba ladep ba la jia ka jingtwa ka kynroh. Kawei pat ka bynta kaba ar jong ka Stadium ka dei ka jingshna ïa ka Indoor Stadium ba la mang pisa T.70 klur eiei. Ka jingtrei ka la sdang bad ka la ïaid shakhmat. Dei na ka jingshna ïa ka Indoor Stadium ba ka nala ka la sahkut da ki synrum kaba la pynlong ïa ka um ban ym lait shabar kat haduh ba ka kynroh ka la twa,” ong u Myntri Rangbah
“Ka kynroh, ha ka jingtohkit, ba la bud na ka Drawing la shna katkum ka jingdonkam ba ladep buhdak,” u la ong.
U la ïathuh ruh khnang ban ïada ïa ki High Mast lane ki jingpynthaba jingshai hapoh ka madan ïalehkai phutbol ki bym shym la ngat satia ha ka jingjulor la pynhiar noh khyndiat khnang ban ïada na kano kano ka jingjulor kaba lah ban jia ha ki sngi ki ban sa wan.
Na ka liang jong ka Sorkar ka la thung ruh da ka jingtohkit Majistor lane ka Magisterial Enquiry halor ka jingtwa jong kane ka kynroh.
