Shillong, Jylliew, 23: U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ha ka sngi Thohdieng u la sam bhah ïa ki 10 ngut ki Executive Member jong ka Executive Committee hapoh ka jingïalam jong u.
U Bah Pynïaid Sing Syiem u la bat hi halade ïa ka tnat General Administration, Finance, Posting & Transfer, Establishment, Appointment bad kiwei kiwei ki tnat ki bym shym la aiti sha ki EM katba u Bah Pynshngaiñlang N. Syiem uba long u Dy. CEM u la ïoh bat ïa ka tnat Elaka Administration, Law & Legal Matters.
Ka Kong Grace Mary Kharpuri ka la ïoh bat ïa ka tnat Market, (Council Market) bad kiwei kiwei ki Iew ba ka tnat Information Technology. U Bah Victor Rani u la ïoh bat ïa ka tnat Arts and Culture, Health and Sanitation, Labour Clearance Certificate bad Fisheries.
U Bah Gigur Myrthong u la shah pynkhamti kum u EM uba peit ïa ka tnat Trade bad Enforcement Wing.
U Bah Rangkynsai Kharbuki u la ïoh bat ïa ka tnat Council Building, Council Assets, Marriage and Divorce.
Ka Kong Magdalyne Sawkmie Mawlong ka la ïoh bat ïa ka tnat Forest bad Town Committee.
U Bah Teiborlang Pathaw u la ïohbat ïa ka tnat Land & Building Byelaws.
U Bah Alvin Khyriem Sawkmie u la ïoh ïa ka tnat Revenue Collection bad Planning.
U Bah Fantin J. Lakadong u la ïoh bat ïa ka tnat Taxation, Water Resource bad ka tnat Mines and Minerals.
U Bah Carnes Sohshang u la ïoh bat ïa ka tnat Development bad Education.
