Ban wanphai jingsuk ha Manipur da ka jingduwai pynlong ki skul Balang Catholic ha ri lum Garo

Tura, Jylliew 23 : Ki Skul ka Balang Catholic kiba don ha kylleng ka Ri-lum Garo, ki la pynlong ïa ka jingduwai ba kyrpang ha ka step sngi Thohdieng na ka byntaban wan phai biang ka jingshongsuk shongsaiñ ha ka jylla Manipur kaba la thut na ka jingmih ka jingïakynad jaidbynriew ha kane ka Jylla.
Kane ka jingduwai ba kyrpang ka long kum ka dak ban pyni ïa ka jingïadon ryngkat bad ki paidbah ka Manipur, kiba la mad ïa ka jingjynjar na ka jingmih ka thma ïapher Jaidbynriew, bad ban duwai ruh ba kan kut noh kane ka jinglong jing man ba mynta khnang ba ka jingsuk kan wan phai pat ha ka thaiñ.
Baroh ki skul ka Balang Catholic ha ki 5 tylli ki District ka Ri-lum Garo kila ïashim bynta shitrhem ha ki Peace Assembly, kiba la pynlong ha la ki jong ki jong ki jaka pule.
Ka thong ba hakhmat eh jong kane ka peace assembly ka dei kaba la leh na ka bynta ban pynsngewthuh ïa ki samla pule halor ki jingjia ha Manipur bad ka jingdonkam kyrkieh ban pynsangeh ïa ki kam ïa umsnam bad ki jingthombor ïa ki jingim ki briew bad nongkynti kynthup ïa ki jaka mane Blei.
Ha kane ka jingïaduwai kyrpang, ki samla ki la ïoh jinghikai halor ka jinglong jingman kaba long mynta ha Manipur bad ka jingkongsan ban leh ïa ki kam ki ban wanrah ïa ka jingsuk, ka jingïamap markylliang bad ka jingïalong kawei. Ki Samla pule ki la pynpaw ïa ka jingkyrshan ïa ka jingsuk lyngba ki placard ba ki rah, kaba ban jur ïa ka jingkongsan jong ka jingïalong shipara bad jingïatylli.
`Kane ka peace assembly bad rally ba la pynlong ha ki skul Catholic ka Ri-lum Garo ka pyni ïa ka bor jong ka jingïatylli bad ka jingsngew para briew. Ka phah ruh ïa ka khubor ka jingsngewlem bad jingkyrshan ïa ki briew kiba la shem lanot ha Manipur da ka jingthmu ba ïa ka sur jong ki yn sa ïohsngew, bad ka jingsuk kan wanphai pat.
Ki bor pynïaid jong kane ka peace assembly ki la pynpaw ïa ka jingsngew nguh ïa baroh kiba la wan ïashim bynta lang bad pyndem ha ka jingduwai na ka bynta ki paidbah ka Manipur. Ki la khot ïa baroh ki paidbah ba kin ïasnohkti lang ha ka ban wanrah ïa ka jingsuk, ka jingïasngew thuh lang ym tang ha ka thaiñ hynrei ha ka pyrthei baroh kawei.