Khmih lynti ban lah ban pynkynriah ia ki Harijan

Shillong, Jylliew 23: U Symbud Myntri Rangbah ka jylla u Bah Prestone Tynsong ha ka sngi Thohdieng u la ong ba ka jingïakren ïasuk ka HNLC bad ka sorkar India bad sorkar jylla (formal peace talks) kan sdang noh hi shen.
“Ka jingïakren kan sdang noh hi shen”, ong u Bah Prestone ha ka jingïakren bad ki lad pathai khubor.
“Ka jingïakren kan kan don lehse arwat ne laiwat hynrei namar ka jingïakynad jaidbynriew ha Manipur ka la pynthut noh ïa kane ka kam bad ngi ngeit ba kan sdang noh hi shen kane ka jingïakren”, u la bynrap.
Haba ïadei bad ka jingthmu ka sorkar ban pynkynriah noh ïa ki Kharmetor ba shong ha Them Iewmawlong, u Bah Prestone u la ong ba na ka liang ka sorkar ka khmih lynti ba ka jingeh kaba mih na kane ka jaka yn lah ban weng noh syndon bad ba ka jingpynkynriah ïa ki Harijan ruh kan urlong noh shen.
“Haba ïadei bad kane ngam kwah bun ktien eiei namar kane ka kam ka don ha kashari bad na ka liang ka sorkar ka kyrmen ba ïa kane ka jingeh ïa yn lah ban weng noh syndon”, u la ong.