Shillong, Jylliew 23: Ka Seng Hynñiewtrep Integrated Territorial Organisation (HITO) ka la leit kyndang ïa kawei ka jingphah thungkam beaiñ da u Myntri ka tnad Soil and Water Conservation u Marquis Marak ha ka tnad Programme Implementation and Evaluation jong ka sorkar jylla.
Ka Seng ka la ïoh ïa ka shithi ba la phah da u Minister sha u Director katei ka tnad treikam ha kaba u la kyntu ïa u ba un thungkam Peon ïa kawei ka Jenny G. Momin da kaba ong ba ka wan na ka longïing longsem kaba duk.
Halor kane ka kam, ka HITP hapoh ka jingïalam u Bah Donbok Dkhar, President, ki la leit ïakynduh ïa u Asst. Director ka tnad Programme Implementation and Evaluation ban ai ha u da ka jingthoh ha u ban pa jingpynshai halor kane ka jingphah shithi u Myntri ka sorkar jylla, uba dei ruh u MLA ka NPP na Williamnagar.
U Bah Donbok haba ïakren bad ki nongthoh khubor, u la ong ba ka Seng kan nym ailad ïano ïano ruh ban ban leh ïa kiba kum kine ki jaitkam beaiñ ha ka jylla, namar ba ki don bun ki samla bad ki briew kiba duk basuk kibym donkam donkam bad don kiba la pyndep ïa ka interview ruh kim ïoh kam. “Kumno une u Myntri u nud ban shu phah thungkam kumne da ka lynti ka bym dei”, u la ong.
Shuh shuh u la ong ba ka Seng kam kheiñ lada kidei na kano kano ka jaidbynriew ruh, hynrei lada dei hi ka kam kaba shu leh beaiñ, ka Seng kan nym ailad satia.
U la ïathuh ba ka Seng kan ap kumba shi taïew ïa ka jubab na ka tnad treikam halor kane ka jingthoh ba ki la ai bad lada kam jubab kan leit beit sha ïingbishar ban ai da ka mukotduma.
