Shillong, Ïaiong 29: Ka North East Indigeneous Peoples Forum (NEIPF) kaba dei ka synjuk jong ki Sengbhalang ka thaiñ Shatei Lam Mihngi ka Ri, kala shong ïa ka jingïalang General Council ha Nagaland ban pynkhie im biang ïa ka jingdawa pyntreikam ïa ka Inner Line Permit (ILP) ha baroh ki Jylla ka thaiñ bad ka jingpyntreikam jubor ïa ka Citizen Amendment Act (CAA).
Kane ka jingïalang General Council ba arsngi kala sdang hynne ka sngi thohdieng bad baroh ki Sengbhalang na ki Jylla bapher bapher ka thaiñ kila iashimbynta kynthup ïa ki seng na Meghalaya-ka FKJGP, HNYF bad RBYF hapoh ka jingïalam jong u President ka FKJGP-North Khasi Hills Bah Luistar Lyngdoh.
U Samla Wellbirth Rani, President ka FKJGP uba dei ruh u Convener ka NEIPF-Meghalaya Chapter u pyntip ba ka NEIPF kan iatai ïa kiba bun ki ishu kiba sahteng ha kane ka jingïalang khamtam ïa ka hok bad ka bha ka miat jong ki trai paid riewlum ka thaiñ Shatei Lam Mihngi bad ka jingktah jong ki aiñ/hukum ba pynmih da ka Sorkar Pdeng na ka por sha ka por.
Kat kum ka jingong jong u, ka jingpynim ïa ka jingdawa pyntreikam ïa ka Inner Line Permit kan dei kaba hakhmat eh namar kane ka aiñ ka dei ka stieh kaba lah ban ai jingiada pura ïa ki trai paid riewlum na ka jingshah tyllep ha ki hehpaid na ri thor ka Ri.
U Bah Wellbirth u ong ruh ba ka NEIPF ka dei ka synjuk kaba la ieng pyrshah naduh kaba nyngkong ïa ka jing thmu jong ka Sorkar India ban pynlong aiñ ïa ka Citizenship Amendment Bill (CEB) kaba la long aiñ mynta sha ka Citizenship Amendment Act (CAA) bad mynta ka jingïakren kan long halor ka jingpyntreikam jubor ïa kane ka aiñ hapoh ka thaiñ.
Lah ban kdew hangne ba ka Citizenship Amendment Act ka dei ka aiñ ka ban kdup ïa ki phetwir Hindu, Sikh, Jain, Khristan bad Budhist na Pakistan, Afghanistan bad Bangladesh kum ki nongshongshnong ka Ri India.
“Ka Thaiñ Shatei Lam Mihngi ka dei ka thaiñ ba shong ba sah da ki paid riewlum kiba rit paid bad ka jingtreikam ka CAA ka dei ka jingma kaba khraw ïa ki riewlum ha baroh ki liang. Ngim kwah ba kiwei ki Jylla ka thaiñ kin kylla long kum ka Tripura” ula ong.
Nalor kine, u Bah Wellbirth u pyntip ba ka hok jong ki trai paid riewlum ka thaiñ ruh ka dei kaba shah tynjuh bha ha kine ki sngi ba mynta na ka jingwanrah bad jingpyntreikam ka Sorkar India ïa ki aiñ bapher bapher ki bym iahap ne ba ktah ïa ki paid riewlum.
“Ngi la ïohi ba ka Sorkar India kala shu pyrshang ban pyntreikam jubor beit ïa ki aiñ kiba ktah ïa ka hok ki paid riewlum ka thaiñ katba nang mih ki sngi. Ngin hap ban mih ban iasaid bad iada ïala ka jong ka hok hashuwa ban dier ka por” ula ong.
