Shillong, Jylliew 18: Ka Tnad Animal Husbandry & Veterinary, ka la dep ban ai injek ïa palat 20,000 tylli ki masi ha kylleng ki bynta ka Jylla ban ïada na ka jingsaphriang jong ka jingpang sniehdoh ba la tip kum ka Lumpy Skin Desease (LSD).
Haba pyntip ïa kane hynne ka sngi U Blei, u Secretary ba khmih ïa ka Tnad Animal Husbandry Dr Manjunatha C ula pyntip ba ka Tnad ka la ïaid injek ïa ki masi ban ïada ïa ka jingsaphriag ka jingpang LSD. Ula ong ba ka Tnad ka la dep ban injek palat 20,000 tylli ki masi kat haduh mynta ka sngi.
Palat 7200 tylli ki masi ki la ïabit ïa kane ka jingpang bad haduh 4588 tylli la lah ban sumar ban ki la ïoh pat ïa ka jingkoit.
Haduh mynta haduh 61 tylli ki masi ki la iap na kane ka jingpang hapoh ka Jylla. Ki dang don sa palat 2500 tylli kiba dang kit ïa une u khniang jingpang ha ka met.
U Dr Manjunatha ula kyntu ïa ki nongri masi ba kin shah ïa ki briew ka Tnad ba kin wan ai injek ïa ki masi jong ki namar kane kan ïada ïa ki masi ba ki ri na ka jingpang LSD.
“Ka jingsumar ka la ïaid ruh ïa kito ki masi ba don jingpang ba kin koit noh. Ki Nongrep ki lah ban phone ha u helpline number” ula ong.
Haba pynmih ia ki jingbthah dang shen, ka Tnad ka la ong ba ka jingpang LSD kam dei satia kaba ïabit sha ki briew. Hynrei, ïa ka doh bad ka dud jong ki masi ba pang ym dei satia ban ïabam ne ban die.
Ka jingpang LSD ka dei ka jingpang khniang kaba saphriang na ka jingdait pyrjong, ki skaiñ bad ki thyllah. Ki mrad ba ïoh ïa kane ka jingpang ki lah ban jem hi hapoh ka 2-3 taiew.
Ka la bthah ruh ba ïa ki jaka ba don ki masi ba pang, dei ban synreit da ka dwai sodium hyphichlorite (2-3%) lane ka phenal (2%/15 minit) lane ka formalin (1%).
La bthah ïa ki nongrep ba kin phone sha ki Rapid Response Team jong ka Tnad lyngba ki helpline number ba kin leit ai injek bad sumar ïa ki masi jong ki hapoh ki sem.
Lada don ki masi ba iap, ïa ka met dei ban shu tep, la ong ka Tnad haba bynrap ba ki ïew masi kiba don hapoh ka 10 Km radius na ka thymmei jong ka jingpang ki dei ban khang khyrdep.
