Ban shngaiñ paidbah, buh da ka jaka test Formalin ha Khliehïew, dawa ki nongkhaïi dohkha

Shillong, Jylliew 18 : Ka Khasi Jaiñtia Fish Wholesaler and Retailer Association ka la kyntu ïa ka sorkar jylla ba kan buh noh da ki jaka test formalin ha Khlieh Iewduh khnang ban test ïa baroh ki dohkha kiba poi man ka sngi sha ïew ha shwa ban pynpoi pat sha kylleng ki bynta jong ka jylla.
“Ngi ruh ngi kwah ba ki paidbah kin shngaiñ, na kata ka daw ngi kyntu ïa ka sorkar ba kan buh noh da ka testing centre ha Khlieh Iewduh,” ong u President ka seng, Bah Mitchel Wankhar.
Nalorkata, u la ong ba ki dohkha ba wan na Andhra Pradesh sha ka jylla kidei beit na pung hynrei don pat ki jait dohkha kum ki ‘kha pamphlet, ki shymprong heh bad katto katne kiba wanrah na duriaw bad ïaid kylleng kylleng ha shwa ban poi sha Shillong.
Da kaba pynpaw ruh ba kim sngew lah ngeit ban shu kynnoh beit ba dei ki khabah ba wanrah na Andhra, utei u president ba dei ruh u Executive Member ka KHADC u la ong lada ki ïalam hi ma ki ïa ka kynhun ban leit peit sha katei ka jylla ba ki wanrah dohkha lehse kan mih beit ka jingkynnoh ba ka long noh shilliang.
“Kumta, ngi kyntu ïa ka sorkar jylla ba lada ka lah ban phah shaduh Switzerland na ka bynta ki kam ri jingri kan eh aiu ban phah na Meghalaya ban phah sha Andhra Pradesh ban wad bniah halor ka kam ri dohkha,” u la bynrap biang.
Shuh shuh u ong ruh ba lada ka sorkar ka shimkhia shisha, ki kloi wat ban ïarap ïa ka kynhun kaba leit wad bniah ban kynduh ïa kito kiba ri dohkha ha Andhra Pradesh.
Ha kajuh ka por pat, u la ong ruh ba kum ka kynhun kin sa leit ruh ban kynduh ïa u Myntri Rangbah ka Jylla Conrad K Sangma na ka bynta ban ïa kren halor katei ka jingshahkhang die dohkha kynsan kynsan ha ka jylla.